GSMC dilgiparang Tripura-ona re•ange Tipraland-na dabianio chakpaaniko on•nea

Tura, August 20, 2022: Garoland State Movement Committee (GSMC), Tripura a•doko donggipa Tribal manderangni Tipraland a•dokko dabianio chakpaaniko on•gen ine u•iataha.

GSMC-ni Co-Chairman Te Balkarin Ch Marak aro Additional General Secretary Bostone M Sangma, Tripura a•dokona re•ange, Tripura Autonomous District Council (TADC)-ni Chairman aro Tipraha Indigenous Religious Progressive Regional Alliance-ni President aro Royal Family-ni Head, Pradyot Bikram Manikya Debbarma-ko gronge chanchirimaniko dakenba uamangni dingtang a•dokna dabianio chakpaaniko on•gen ine parakataha.

GSMC dilgiparang Bristibar salo Pradyot Bikram Manikya Debbarma-ko gronge, tribal manderangko chel•chakna Tipraland aro Garoland a•dokna dabianio apsan ku•monge kamrangko ka•angna nangnikaniko parakataha.

Uamang uamang mongsongbate indigenous tribe Tripura a•dokni tribal manderang aro Meghalaya a•dokni Garo-rangko chel•chakna Tipraland aro Garoland-ko on•na nangchongmota ine dabiangaha.

GSMC dilgiparangni u•iatani gitade, Debbarma uamangni dabianirangko knachake nama aganchakanirangko on•ataha. GSMC dilgiparang, Tripura a•dokni Cabinet Minister NC Debbarma-koba grongbaaha. Uamang Garoland aro Tipraland a•dokko tribal manderangni namgnina ra•bae on•na nangchongmota ine dabiangaha.