Tura, September 19, 2022: East Garo Hills a•jani Council of Nokma Skotong Minister Conrad Sangma-ni Sixth Schedule a•jao CrPC aro CPC-ko ra•gatna am•aniko raken jegalataha.
Skotong Minister Conrad Sangma-ni CePC aro CPC-ko a•doko ra•gatna miksonganiko Williamnagar-ni Council of Nokma Sonibar salo raken jegalataha.
Council of Nokma-ni parakatani gitade, Sonibar salo Williamnagar-o donggipa Council of Nokma conference hall-o tom•aniko ong•ate, Skotong Minister Conrad Sangma-ni CrPC aro CPC-ko ra•gatna miksonganiko raken jegalangtokaha.
Indiba Skotong Minister-ni parakatani gitade, ia CrPC aro PCP-ko ra•gatanio, maming dakeba Village Court aro District Council-o bak nangejawa ine parakatskaha.
Pa Sangma, “Sixth Schedule-ni ning•o donggipa, District Council Court aro Village Court-ni bilko Magistrate-na pakwatna nanggen” ine agangimin katta gnang ine Council of Nokma janapatskaha.
“Magistrate”-rang CrPC aro CPC-ni niamrangko ja•rikgiparang ong•a. CrPC aro CPC-ko ra•gatanio Conrad Sangma mamingkoba donnugija uni miksonge dongenggipa kamrangko parake on•na nanga ine Council of Nokma parakataha.
“Chinga A•chikrang skang chengonin District Council Court, Lasker Court aro Village Court-o dakrongbewal gitan magitcham pagitchamrangni aganskie donanggipa niamrangko ja•rike raiko on•ronga. A•chikrangni niamo gita, nokdango ba maharini gisepo ma•sisretanirang donggenchimode, uarangko Chrarang pangnan biltangko jakkale namatgrike on•ronga. Apsan daken songni ning•o maiba obostarang ong•genchimode, Nokma Sardar aro Lasker-rang namatgrike on•skaa. Songo noko Chra, Nokma, Sardar aro Lasker dongani a•selo bang•a manderangna dakchakani ong•a. Songni bang•a manderangan pulis station-ona re•ange badi ka•na mangba basakobade chol ong•ja aro bang•bata somoirangon songni kajia golmalko Nokma-chi aro Mahari Chrachi bichal ka•e namgrikatronga. Songo noko namgrikatna man•telgijaparangkosa pulis-darokkaona sokata, indake ong•engon songko nokko nirokgipa aro rai on•na bil donggipa manderang dongani a•sel gimiknan namgni ong•a.
Uni gisepon ia CrPC aro CPC-ko ra•gataniara Sixth Schedule-ni ning•o ga•akgipa manderangna dal•a sinjetani ong•gen.
Bang•bata A•chikrangan songni nokni golmalko songni dilgiparangchin namgrikate donronga” ineba janapataha.
Skotong Minister Conrad Sangma, a•dokni sorkari District Council Court-na ba Village Court-ni namgnina darangkoba mikkang nitegija dingtangmancha niamrangko taridapatgenchimode, chinga uako jegaljawa.
Indiba chinga CrPC aro CPC-ko ra•gatgenchimode, District Council Court, Lasker Court aro Village Court ba ja•rikna nanggnok ine agangipa kattako raken jegalchongmota. Ua niamrangko taridapna sikgenchimode, skanggipa songrangchi re•ange songni niam reti aro dakbewal rikbewalrangko ma•sie ra•chengna nanggen. Ua (Conrad) District Council-ni MDC-rang baksa niamrangko dingtangatna ba taridapna chanchiaiode, uamang an•tangni namgninasa kam ka•a gita ong•enga. District Council-o bang•a mikkang niteanirang gnang, uamang bang•a changon an•tangni namgnina aro an•tangni mandenasa kamrangko ka•bata ine Council of Nokma, Skotong Minister Conrad Sangma-na u•iataha.