Shillong, July 30, 2022: A•dokni gitcham Home Minister Robert Garrett Lyngdoh, adita jarangna be•en an•senggijaniko man•ne July 29 tariko an•tangni ka•sagipa nokdangni manderangko wate jringjrotna neng•takram biapona re•angaha.
Ua bilsi 61 ong•ahachim aro ua adita jarangna ka•tongni (cancer) sabisiko man•ne Shillong songjinmani Bethany Hospitalo Intensive Care Unit (ICU)-o donne sanaha, indiba July 11 tariko uni saa blongbatroroaha. Indake ua July 29 tariko pring 11:40 bajimango, Nongrim Hills-o donggipa an•tangni noko janggi galaha.
Indake uko July 31 tariko, Mawprem-o electric crematorium ba bijolichi so•e galanggen.
“Ua an•tangko gope galjachina so•e galchina aganronga, uni agangimin kattako ja•rike, chinga uni manggisiko Mawprem-o so•e galgen” ine nokdangni manderang parakataha.
RG Lyngdoh, Laitumkrah elekkani gitcham MLA aro Home Minister ong•achim, ua bilsi 10, term gni joljol 1998 bilsioni 2008 bilsiona Laitumkrah elekkani MLA ong•e kamko ka•angaha.
Ua Lok Sabha-ni gitcham MP aro Meghalaya a•dokni gitcham Speaker, Peter G Marbaniang-ni depante ong•achim, unbaksana East Shillong-ni MLA Ampareen Lyngdoh aro West Khasi Hills a•jani Superentindent of Pulis Herbert G Lyngdoh-ni Adagipa ong•achim.
Ua 2013 bilsioni 2017 bilsiona Marthin Luther Christian University (MLCU)-ni Vice-Chancellor ong•e kamko ka•angaha.
Ua Politician ong•aigija, doka dam•anioba saksa mingsinggipa mande ong•achim. Ua Harmonica salna changgipa saksa mingsinggipa ong•achim aro Blues Band “Mojo” ko bikotdilgipaba ong•achim.