Tura, July 30, 2022: Meghalaya a•dokni BJP Vice President aro Tura MDC Bernard Marak-ko Uttar Pradesh a•dokni Hapur a•jao rim•ani salgni ja•man Tura-ona rimbaplaha.
Ua Bristibar pringo Guwahati songjinmaona sokbaaha, indake Meghalaya Pulisrang uko attamon Tura songjinmaona rimbaaha. Tura-ona sokbaani bakan uko Medical Examination-na Tura Civil Hospital-ona rimangaha.
Indake Medical Examination-na rimangani ja•mano uko Court-ni Chief Judicial Magistrate jean una Non-Bailable Arrest Warrant-ko on•ahachim, uni mikkangona rimangaha. Indake uko CJM sal chetna Pulis Custody-o donna raiko on•angaha.
Bernard Marak-ko, Tura Edenbario donggipa uni bagano ong•gija kamrangko ka•enga ba ‘brothel’ nokko chalaienga ine July 26 tariko Uttar Pradesh-ni Hapur a•jani Philkuwa songoniko rim•aha.
Philkuwa Pulis aro Uttar Pradesh-ni Special Operations Group (SOG)-ni dakchakanichi uamang Meghalaya pulisni “look out notice”-ko man•soe Ghaziabad border-ni Toll Plaza sepangoniko rim•aha.
Meghalaya pulisrang pilak dakna nanggni kamrangko matchote uko Philkuwa Pulis Station-oniko a•doktangona rimbaaha.
Indake West Garo Hills a•jani District Administration ia obostani bidingo sing•sandianiko dakna gita, Executive Magistrate, Rezia Ch Sangma-na pakwatangaha. Ua sal 15-ni gisepo sandiani (inquiry)-ko matchotate report-ko Deputy Commissioner-na on•china ge•etangaha.