Baghmara, August 23, 2022: South Garo Hills a•jani ning•o donggipa Nongalbibra-ni NGO-rang GSU aro FKJGP apsan nangrime, South Garo Hills a•jani a•jani Deputy Commissioner-na lekka sedoataha.
NGO-rangni janapatani gitade, “Re•anggipa August 11 tarik pringni 11 bajimango Nongalbibra sepango donggipa Nengbrek gittimni me•chikma saksa Suritha N Sangma bijoli nange janggitangko gimaataha. Nongalbibra-oni Darang Boldak songona salanggipa 11KV bijoli line ba silitting namen ondimani a•sel bang•a matburingrang aro manderangna kenbeani ong•enga.
Ia 11 KV bijoli line tang•onako SDM aro FEDCO Company simsakjani a•sel me•chikma saksa janggitangko gimaataha. Nongalbibra-o ia a•sel ong•ani skanggipa chang ong•jaha ineba janapataha.
“Chinga indakgipa obostarang ong•na kenchake changni chang SDM baksa agan golpogrikaha, indiba maming taridapani dongja. Uasan ong•aigija FEDCO Company-o chu•onga gita kam ka•gipa manderang dongja. Uni gimin chinga NGO-rang ia obostani bidingo jakgittele sandianiko ba Independent Inquiry-ko dakchina aro sandie man•gipa report-ko Power Minister-na on•china mol•mola.
Unbaksana a•dok sorkari aro FEDCO Company baksa soi ka•gimin MoU-ko ra•galchina NGO-rang mol•molataha”
Ia mol•molaniko a•dok sorkari aro FEDCO company knachakja ong•ode, mikkangchi raka ja•kurangko de•e jingjengatanirangko dakanggen ine NGO-rang parakataha.