Shillong, April 29, 2022: Meghalaya Assembly-ni Speaker aro UDP dolni President Metbah Lyngdoh, Assam aro Meghalaya a•dokni sima ario so•sojengjeng kajia gomal ong•ani bidingo Skotong Minister Conrad Sangma baksa agangrikgen ine parakataha.
Kobor ra•timgiparangna aganengon, Metbah Lyngdoh, bang•a NGO-rang Memorandum of Understanding (MoU)-ko jegale jingjengatanirangko nike ia obostani bidingo skotong minister baksa agan golpogrikna nanggen ine aganaha.
“Anga skotong minister baksa asonge MoU-ni bidingo aro gipin kamrangni bidingo agan golpogrikgen. Skotong Minister-ni re•baa ja•mano anga uko gronggen. A•dokni pilak manderang MoU-ko jegaltokengani gimin ia obostani bidingo golporikna nangchongmotenga” ine Lyngdoh aganaha.
A•dok sorkarini MoU-o soi ka•na chanchirimanio Regional Party-ni dilgiparangba dongpaha aro MoU-ko soi ka•ani somoioba dolgittam Regional Party-rang UDP, PDF aro HSPDP Minister-rangni mikkangosa MoU-ko soi ka•aha ine Skotong Minister Conrad Sangma talatskaha.