Ampati, 6 April 2022: Ja•manchake Kobor man·soani gitade South West Garo Hills a·jani ning·o donggipa Mellim Sentapara songo re·anggipa April 4 tarik Sombal atttamni 9 bajimango mikka balwa ta·rakanichi saksa mandeni nok-ko bol be·dapaha.
Koborna u·iatani gitade, Nangrin Ch Marak aro uni jikgipa Inde Ch Sangma baksa depante chonbatgipa Mikka Balwa ta·rakani gimin noko nape dongengachim, indakmitting somoio rang·gitik balwa ta·rakenba uamangni nokko bol be•dapaha.Bol be·dapmitingo uamang nokningo dongengachim, indaken kate jokna cholko man·jaha aro nokni skotong Nangrin Ch Marak billongbee saknaniko man·ahani gimin bakan uko sana bananiko dakna Chong·potgre PHC-ona ra·angaha. Uni saknaarang biljimbatroroani gimin, Tura Civil Hospital-ona ra·bahachim, indiba rasong gribie Damalgre sokna skangan ua janggi galaha ine u•iataha.
Nangrin Ch Marak sagini jikgipa aro uni depante ma·ningsa sakgniba bilongen saknaniko man·aha, uamang an·tangtangko sana-bananiko dakna gita maming chol dongjani a·selo nokon saknako man·ne dongengachim, indiba chonbatgipa depante jean Mellim Sri Sri Knowledge Skul Centre-o class 2-o poraiengachim, ua bi·sako Mellim Sri Sri Knowledge Skulni Principal chu·gimik sana bananiko dakenga ineba u•iataha.