Shillong, April 6, 2022: All Khasi Hills A•chik Federation (AKHAF), Meghalaya a•dokni ning•o donggipa bang•a songrang Hahim, Salbari, Malchapara aro gipin dam 12 songrangko Assam a•dokna pakwataniko raken jegalataha.
AKHAF-ni Publicity Secretary Sanggra Marak u•iatani gitade,“Chinga AKHAF, ‘Give and Take Policy’-ko ja•rike Meghalaya a•dokni dam 15 songrangko Assam a•dokna pakwataniko raken jegala. Ia obostako chagrongenggipa songni manderang duk mikchi ong•e bang•a neng•nikanirangko man•tokenga. A•dokni skotong minister Conrad Sangma aro Assam-ni Skotong Minister Himanta Biswa Sarma March 29 tariko Union Home Minister Amit Shah-ni mikkangona re•ange soi ka•na skang an•tangan ua songrangona re•ange mikrontangchi nicheng sing•chengesa ja•kuko de•na nanga. Skotong Minister ia obostani bidingo maming ja•ku de•aniko dakjagenchimode, chinga mikkangchi jegalaniko mesokna jingjengatanirangko ong•atanggen. A•dokni sima ario golmal ong•anina chinga MDA sorkariko raken jegala. Conrad Sangma saksa An•chik dilgipa ong•e, jattangko duk mikchi ong•ate kal•steke rona nangja” ine AKHAF ni President suk ong•gijaniko parakataha.