Tura, Nov 1, 2022: Meghalaya a•doko TMC dolko bilakdapatna gita North Tura aro South Tura elakkao Mahila Block Committee-rangko Monggolbar salo songangaha.
Mahila Committee-ko songani salo Meghalaya Pradesh Mahila Trinamool Congress Committee-ni President Ma Selma D.Shira jinmana aganengon, “Anga ma•giparangko gisik ka•tong gimikchi mittelna sika, jemamgan TMC baksa ku•monge kamrangko ka•na gita re•baha. TMC dol bilakgipa aro mikkangchina niksamsoa gnang kamrangko ka•enggiparangoni Mahila dolba ong•enga” ine Ma Shira aganangaha.
Tom•anio Meghalaya TMC West Garo Hills, District Convenor Richard Mrong Marak-ba dongpae, “Chinga bang•a manderangni TMC dolna chakpae bakrimna re•bagiparangko kusi ong•e rimchaksoenga. Unbaksana a•dok gimikni ma•giparang TMC dolna uamang chu•gimik chakpaaniko on•enga aro uamang da•o ong•enggipa sorkarini kamrangko namen ma•sia TMC-san a•doko bilakbatgipa dol ong•enga” ine Richard Marak aganangaha.
TMC dilgiparang a•doko ong•gija sason ka•engani gimin talatengon, NPP-chi dilenggipa MDA sorkarini kamrangko agan talate on•angaha. A•doko songdongenggipa manderang uamangni nangnikako man•jaenga. “A•doko dilsretanirangko man•enggiparanga, kam gri dongenggipa chadamberang aro manderang, sorkarini kosako chakate an•tangtangni man•gnirangko on•china bi•na nangenga. Ma•giparang aro chadamberangni nangnikanirangko bilsi 4 ja 6 ong•oba, Skotong Minister Pa Conrad Sangma-ni namgija sason ka•ani a•sel gimikan chakchike sengna nangengaha” ineba janapataha.
Skotong Minister Conrad Sangma Meghalaya a•dokni manderangko tangkachi brena jotton ka•anian gualna man•gijahipa uni kam ong•a. “Dr. Mukul Sangma a•doko namroro silroroanina, Social Welfare Program-rangko a•bachengate, Human Capital Development-ko ra•baha, indiba Skotong Minister eleksin-na skang manderangko tangkachi brena jotton ka•skaenga” ineba TMC dilgiparang janapataha.
Meghalaya TMC seoka man•gipa committee membor-rangna kusi ong•aniko parakatenba, ma•giparangni namgnina kamrangko ka•angchina uamangko didiangaha. Jedakode a•dokko gital dake namatpilna man•gen ineba agan ku•pattidapataha.