Shillong, November 1, 2022: Meghalaya TMC North Shillong Block-ni President Elgiva Gwyneth Rynjah, Sombar salo Deputy CM Preston Tynsong-ni agangipa kattarangko jegalataha.
Batanggimin salrango Deputy CM Preston Tynsong, “Mawkynrew songo powder aro lipstick-rangko chinga NPP dol on•anggen, jedakode uarangko jakkale songni manderang sildapgen” ine aganahachim.
Uni agangipa kattarangko jegalatenba Elgiva Gwyneth Rynjah, “A•dokko jatko dilenggipa saksani ku•sikoniko indakgipa kattarangko knaaniara kraani ong•ja. Uni ku•sikoni ong•katgipa kattarangchin, uni cholon bewalko ma•sirikna man•a” ine Elgiva Rynjah aganchakatskaha.
Batanggimin bilsi 4 ja 6-o NPP sorkari a•dokna maming namgniko ra•bajaha. Uamang a•dokko tang•dodapatna, bidako baridapatna, Hospital-rangko rikdapna, rama jal•langrangko tarie on•na maming chanchiani dongja. Skigiparangni re•jomiting somoio mai obosta ong•aha, uko pilakan u•itoka. Indiba ia obostarangko nikgija NPP dolni dilgipa songni manderangna Lipstick aro powder-ko suale on•gen ine agananiara ra•chakna man•gijagipa katta ong•a ineba Elgiva Gwyneth parakataha.