Tura, Aug 10, 2022: Meghalaya Pradesh Trinamool Congress (TMC) Dadenggre TMC Block Committeel Meeting-ko Monggolbar salo ong•atangaha.
Ia tom•bimonganio West Garo Hills District TMC dilgiparang Dadenggre Block TMC Committee-ko songe dilgiparangko seokangaha.
Seoka man•gipa Dadenggre Block TMC Committee-ni dilgiparanga President Rupa M.Marak, sak 6 Vice President-ranga Sonseng Marak, Pretson Ch.Marak, Great Ch. Marak, Kabat Marak, Kreal Marak, Griting Albe Marak, General Secretary Boas Marak uko dakchakgipa sak 4 Joint Secretary-ranga Tengrang Momin, Gret Sangma, Goben Sangma, Balsen Marak, Working President Michael Momin, Chief Adviser Polmonsing Sangma, sak 3 Adviser-ranga Ma Arobina M.Sangma, Sikke Marak, Ma Panse R.Marak, Chief Organising Secretary Silbanush Marak, Organising Secretary Jerny Carry Marak aro sak 41 Executive Membor-rangko seokangaha.
Ia tom•bimonganio TMC-dilgipa Dr Mukul Sangma mongsonggipa sokgipa ong•e tom•aniko mikkim gnangataha aro gipin dilgiparanga Rangsakona MLA Zenith Sangma, Chokpot MLA Lazarus Sangma, Dengnakpara MDC Sadhiarani Sangma, Kharkutta MDC Cherak W.Momin, Rongrong MDC Rinaldo K.Sangma, Amongpara MDC Nehru D.Sangma, Balachada MDC Agassi R.Marak, Betasing MDC Sanjay Koch, gitcham MLA, MDC-rang aro dingtang dingtango gadangni TMC dilgiparang bakko ra•angaha.
Indake ia tom•bimonganiko ong•atani salo adita sak NPP dolna kam ka•giparang NPP sorkarini kamko namnikjae, NPP doloni ong•kate TMC dolo napangskaha.
Dr Mukul Sangma tom•anio dal•batgipa sokgipa ong•e, jinmana aganprakangengon, GHADC-ni B-Mahal a•arangko MIDC aro MTDC department-na palaniko raken jegalangaha. District Council a•ani nokgipa ong•ja, District Council, Sixth Schedule-o ga•akgipa jolrangko ripingna ba nitimchina gitasa donaha, a•a pale cha•china seoke watatja aro GHADC a•a pale cha•na bil dongja. Pala ong•ode a•dok chigani nokgipa songsul noksul baksa melie palna man•a. Nokmaba saksande a•a pale cha•na man•ja. Mai niamo pangchake GHADC, B-Mahal-ni a•arangko pale cha•aha, atchu-ambini donanggipa gam-jinko district council maming dakeba pale cha•na niam dongja aro A•chik jatni a•ako ba bagan bariko pale jatko duk mikchi ong•atna nangja, batesa chel•chakna nanga. GHADC, B-Mahal-o jolo songdonggipa manderangko sandie Nokma gate on•na nanga. Nokma gatkujani giminsa ua a•arang B-Mahal-o ga•akenga, ua a•ani nokgiparang gnang, uamango sing•cheng sanchenggija skatang B-Mahal-ni a•arangko palna man•ja ine Dr Sangma agan talatangaha.