Tura, August 8, 2022: Womens’ Trading Organization (WTO)-ni President Monika D Momin, Director General of Pulis (DGP)-na lekka sedoatenba, Tura Pulis Station-ni Officer Incharge-ni kosako CrPC 154 (3)-o pangchake badi ka•angaha.
Uni janapatani gitade, ua July 6 tariko Tura bajaro badinggipa sakgittamni kosako Tura Pulis Station-ni Officer Incharge-o badi ka•ahachim. Indiba Tura Pulis Station-ni Officer Incharge, uni badi ka•anina maming sing•sandianiko dakjaha aro register-oba badi ka•aniko segatna jechakaha. Indake uni badi ka•aniko pulisrang maming ja•kuko de•jaha aro badi ka•anio janapani gita dos dakgipa mandeko niam gita kragipa IPC Section-o pangchake rim•jaha ine parakataha.
CrPC 154-o janapani gitade, darang pulis officer-ba badi ka•aniko segatna jechakna man•jawa aro badi ka•ani bidingo tale sing•sandie kakket bichalko ra•bana nanggen, unbaksana CrPC 156 aro 157-o janapani gitade pulisrang manderangni FIR ka•ako register-o segatna nangchongmota aro sing•sandianiko dakna nangchongmota ine sea gnang. Indake pulisrang niamni kosako re•e FIR ka•ako register-o segatna jechakaha aro maming ja•kuko de•jaha.
“WGH a•jani Suprentindent of Pulis (SP) Suo Moto FIR vide GR Case No.46/2022, Tura P.S. Case No. 29(2) of 2022 u/s 120(B)/ 379/468/406/407 & 420 IPC-o pangchake niam gri ta•makku badinggiparang Nirush M.Sangma, Topash Mondal, Saurab Kundu, Chandan Gosh aro gipin manderangko February jao rim•aha. Indake anga July 6 tariko Hari Gopal, IP Gupta, aro Sanjay Prasad-ni kosako niam gri ta•makku badinganina aro palanina badi ka•aha aro Tura Pulis Station-ni Officer Incharge-ko ia obostani bidingo register-o segate sing•sandianiko dakchina didiaha. Indiba angni badi ka•agipako register-o segatja aro maming sing•sandianiko dakja. Indake Changchang Marak angni kosako tol•e badi ka•ahaon, Officer Incharge uni badi ka•aniko segate, Tura PS Case No. 156(7) of 2022 u/s 447, 448, 506 & 34 IPC-o pangchake angni kosako mamlako segataha. Anga ta•makkuko stock ka•e palenggipa aro unbaksa gipin bosturangko wholesaleo palenggipa mandeko, Garo Hills District (Trading By Non-Tribals) Regulations 1957-o janapgimin niamrangko pe•anina badi ka•aha, indiba Officer Incharge angni badiko segatjaha aro sing•sandianiko dakjaha. Indiba pulisrang Changchang Marak-ni angni kosako badi ka•anikode segataha aro angko salantian sing•sandina nanga ine Pulis Station-ona okamate ka•mikennate roenga. Angni kakketgipa obostani gimin badi ka•anikode uamang segatjaha, indiba angni kosako ong•gija badi ka•akosa segatpilaha. Anga an•tangni kakket ong•aniko Court-na sakki gnang mesokna man•aigen. Indake anga Tura Pulis Station-ni Officer Incharge-ni kamko raken jegala, ua CrPC 156 aro 157-o segimin niamko pe•aha” ine Ma Monika Momin uni badi ka•anio janapataha.