Tura, September 27, 2022: Monggolbar salni bako All India Trinamool Congress (AITC)-ni National Spokesperson Saket Gokhale a•dokni Skotong Minister Conrad Sangma-ko media-ni mikkango Smart Meter Electricity, Meghalaya Assembly Dome be•gruani bidingo, Shillong Smart City Ltd, Saubhagya Scheme aro Vehicle Scam-ni bidingo jera ra•grikna ra•biataha
“Meghalaya a•dok sorkari, jinmana kakket ong•e kamko ka•enga ong•ode, maini gimin jinmani mikkango jera ra•na jechakskaenga” ineba sing•doangaha.
Gokhale-ni Conrad Sangma-na seatgipa chittio janapatani gitade, National People’s Party (NPP) dolni Minister-rang bang•a changon jera ra•na jechakronga. Rajya Sabha-ni Membor aro NPP dolni State President, WR Kharlukhi-ba bang•a changon jechakronga.
“Nangni choljoka somoiko ra•e, October jani skanggipa antio MDA sorkarini je Minister-koba nominate ka•e jera ra•grikna watatbo” ine u•iataha.
Batanggimin somoio Saket Gokhale, a•dokni Deputy Chief Minister Preston Tynsong-ko jera ra•na ra•biangaha indiba ua jechakaha ine parakataha.