Shillong, September 27, 2022:North East Olympic Games-ni gnigipa edition-ko Meghalaya a•dokni bilsi 50 gapaniko maniani bak gita November jao ong•atna tik ka•angaha.
Skotong Minister Pa Conrad Sangma Sombar attamo Shillong Pinewood Hotel-o tom•aniko ong•ate, Meghalaya a•dokni mongsonggipa matburing ba State Animal Clouded Leopard-ni bimangko tarigimin NEO logo-ko oprake on•angan baksa kal•susaani website aro information booklet-ko a•bachengate on•angaha.
Ia North East Olympic Games (NEOG)-o kal•susaaniko bilsibri ja•man da•o re•baenggipa November 10-16 tarikona Meghalaya a•doko soka chakgen. Ia NEOG-ko re•anggipa 2018 bilsio skanggipa changna Manipur a•doko ong•atangaha. Indake ia kal•ausaanio sak 3,000 athelete-rang, Officer-rang aro spectator-rang ming 18 discipline-rangko ja•rike bakko ra•anggen ineba parakangaha.
Ia tom•anio a•dokni Chief Secretary Donald P Wahlang, Department of Sports and Youth Affairs (DSYA)-ni Commissioner aro Secretary Dr. Vijay Kumar, Health and Family Welfare-ni Secretary RM Kurbah, DSYA-ni Under Secretary Shivanash Awasthi, East Khasi Hills a•jani Deputy Commissioner Isawanda Laloo, Meghalaya State Olympic Association (MSOA)-ni Working President John F Kharshing aro gipin dilgiparang bakko ra•angaha.
A•dok sorkari NEOG-o kal•susaenggipa sakantina chu•gimik dakchakaniko on•na gita ku•rachakangaha.
“Anga Meghalaya State Olympic Association aro Department of Sports and Social Affairs-ko uamangni rakbee kamrangko ka•enba ia North East Olympic Games-ko ong•atna tarisoani gimin dingtangmancha mittelna sika” ine Skotong Minister aganangaha.