Tura, August 10, 2022: Meghalaya Pradesh TMC Monggolbar salo West Garo Hills a•jani Dadenggre elakkao dal•begipa tom•bimonganiko ong•atangaha. Indake ia tom•anio TMC dolni mongsonggipa dilgiparang aro Meghalaya a•dokni TMC dilgipa Dr. Mukul Sangma dal•batgipa sokgipa ong•e bakko ra•angengon, Chokpot-ni MLA Lazarus Sangma aro Rangsakona-ni MLA Zenith Sangma-ba dongpae bakko ra•angaha.
Indake ia tom•anio Dr Sangma jinmana aganprakengon, a•dokni Skotong Minister Conrad Sangma-ni dilenggipa MDA sorkariko matnange aganangaha.
“Batanggimin somoio angni sorkariko rikenngmittingo manderangni neng•nikanirangko nike bang•a namgnirangko tarie donangaha. Indiba da•o ong•enggipa MDA sorkari, manderangni re•na dona nangbatsranggipa ramarangko tarie on•a dongja. Dadenggre-ko napake Phulbari-oni Rongram-ona re•gipa rama obosta dongjaha. Uamang maini gimin ia ramako tarie on•jaenga. Ia kamrangko ka•na sorkari Meghalaya Integrated Transport Program (MITP) gita World Bank-ni dakchakaniko ra•na man•a, chinga skanggipa phase-o chinga 120 million dollar-rangko man•baha, indiba da•o ong•enggipa sorkari maini a•sel kamrangko ka•na ja•ku de•jaenga. Dadenggre-ko napake re•gipa Phulbari, Rongram ramako tarigipa project-na tangka gong kror 130-ko sanction ka•aha, uanoniko kror 77 tangkarangko contractor-na on•manaha, indiba ia ramako tariani 30 percent-ba matchotkuja. Sing•sandie ma•siani gitade, Meghalaya Legislative Assembly-ko rikgipa apsan contractor-an ia ramako tarina contract man•aha. Ua an•tangni man•gipa project-rangko name kam ka•jaha” ine Dr Mukul Sangma aganangaha.
Indake ia tom•a matchotani ja•mano Dr Mukul Sangma B-Mahal-ni gimin kobor ra•timgiparangna agantalate on•angaha.
“Meghalaya a•dokni ning•o donggipa pilak gam jinrang a•doko songdongenggipa A•chik, Khasi aro Jaintia jatrangnisa ong•a. Unbaksana an•chingni pagitcham ma•gitchamrangni ripinge donanggimin niam retirangko niatgenchimode, a•ani gam jinko nirokgipa nokgipa an•chingan ong•a. Uandake B-Mahal-ni a•arangko niatgenchimode, ua biapo chasongni chasongna songdongbaenggipa manderangni a•arang ong•a. District Council-ni kamde ua biapo songdongenggipa manderangko nirokanisa ong•a, uamang a•ako a•kange pale cha•na maming bil dongja ine agan-talatangaha.
Uandake Dadenggre Block TMC-ni dilgipa Rupa Marak, “Dadenggre elekkani manderang NPP dolni rikenggipa MDA sorkarini tol•ako bebe ra•tokjaha. Uamang gital sorkariko sandienga, jean a•dok chigako nirokgipa aro ripinggiparang ong•gen ” ine aganangaha.
Meghalaya TMC dolko Dadenggre-ni manderang kusi ong•bee rimchaksotokaha aro sak 1500-na baten manderang TMC dolo donge kamko ka•na bimingtangko segatangaha. Ia tom•anio Kharkutta elekka-ni MDC Cherak Momin, Dengnakpara elekka-ni MDC Sadhiarani Sangma, Amongapara-ni MDC Nehru D Sangma, Rongrong elekkani MDC Rinaldo K. Sangma, Betasing elekka-ni MDC Sanjay Koch, Balachanda elekkani MDC Agassi R. Marak, jean Meghalaya Pradesh Trinamool Youth Congress-ni General Secretary-ba ong•engachim, unbaksana gitcham MLA, MDC-rang dongpae bakko ra•angtokaha.