Meghalaya BJP, Tura-ni SP, DC-ko kam ra•jitangchina dabie governor-na lekka sedoanga
Shillong, Aug 2, 2022: Meghalaya BJP dilgiparang aro party kam ka•giparang Tura SP aro DC-ni ong•gijagipa kamko jegale Sombar salo a•dokni Governor Satya Pal Malik-ko gronge Tura-ni SP Vivekanand Singh Rathore aro DC Swapnil Tembe-ko kam ra•jitangchina dabiangaha.
West Garo Hills-ni SP aro DC-ko kam ra•jitangani ja•mano Tura MDC aro a•dokni BJP Vice President Bernard N.Marak-ni mamlako jakgittele judical inquiry ka•china dabiangaha.
Tura SP-ni matnanga gitade, Rimpu Bagan (RB)-o donggipa farm house-o ong•gija kamrangko ka•enga ine tol•enba Bernard Marak-ko rim•aha baksana BJP worker-rangko pulisrang changni chang okgamate sasti on•ne roenga ine a•dokni BJP President Ernest Mawrie, Tura-ni SP aro DC-ko matnangaha.
Indake West Garo Hills-ni BJP dilgiparangko aro BJP dolna kam ka•giparangko kragija kal•ake roenggipa Tura SP aro DC-ni kosako ta•rake raka ja•kuko de•china BJP dilgiparang a•dokni governor-na lekka sedoate didiangaha.
A•dookni BJP President Ernest Mawrie, koboor ra•timgiparangna aganani gitade, Tura-ni SP aro DC mongsonggipa sakgniko kam ra•jitatani ja•manosa ia obostani bidingo ning•tue sandina man•gen ine aganangaha.
“Uamangko kam ra•jitangosa jakgittele aro darangkoba mikkang nigija apsan dake sandina man•gen” ineba Mawrie agandapataha.
Indake ong•engon, ia obostani bidingo kamko ka•anggen ine a•dokni governor ka•dongani kattarangko BJP dilgiparangna aganataha.