Tura, August 1, 2022: Association for Democracy and Empowerment (ADE) Apex Committee, Tura GHADC-ko chalaienggipa EC-rang B-Mahal-ni a•arangko Meghalaya Industrial Development Corporation (MIDC) aro Meghalaya Tourism Development Corporation (MTDC) Department-na palaniko raken jegalataha.
“GHADC-ko NPP-chi dilenggipa Executive Committee (EC)-rang B-Mahal-o songdongenggipa manderangna maming u•iata gri a•arangko palaha. Iani bidingo warachakenggipa dolni MDC-rang re•anggipa GHADC budget session-o jera ra•na motion-ko ra•bahachim, indiba GHADC-ko chalaienggipa EC-rang, warachakenggipa dolni ra•bagipa motion-ko ra•chakjaha. Indake iani bidingo namedake talna gita man•jaha. Manderangni vote pu•onachisa GHADC-o NPP EC-ko rikna man•aha, indiba maini gimin GHADC-ko chalaienggipa EC-rang songdonggipa mandetangni raiko ra•chakjaha? Je kamko ka•na aro ja•ku de•na skangba uamang manderangni raiko ra•chongmotna nanga. B-Mahal-ni a•arangko palaha ine agangipa kattako knasoe, songni manderang jajrenge gisiko suk ong•tokjaenga. Uamang Assam aro Meghalaya a•dokni sima ari jolo donggipa manderangni obostako nike jajrengtokenga. Uamang B-Mahal-ni a•arangko palani gimin mamingkoba ma•sija aro uamangna maming koborko on•jaha. Uni gimin ia kam jinmani nikanio ra•chakna man•gijagipa ong•a” ine ADE-ni President Dalseng Bira Ch.Momin parakataha.