Tura, December 3, 2022: Meghalaya Assembly-ni gitcham Speaker Abu Tahel Mondal Sonibar salo NPP dolo napangaha.
Abu Tahel Mondal November jani 29 tariko Congress doloni ong•kate, December 3 tariko Shillong songjinmaona re•ange Skotong Minister Pa Conrad Sangma aro gipin dilgiparangni mikkango NPP dolo napeskaha.
Skotong Minister, Abu Tahel Mondal-ko kusi ong•bee NPP nokdangona rimchaksoaha. Mondal re•anggipa 2013 bilsioni 2018 bilsiona Phulbari elakkani MLA ong•e, Assembly-ni Speaker ong•angaha.
Indake da•o re•baenggipa 2023 bilsio ua, NPP doloni Phulbari elakkao MLA-na susaanggen.
Phulbari-ni da•o ong•enggipa NPP MLA SG Estamur Mominin BJP dolo napangenba, BJP dolni ticketo susaangskagen.
AT Mondol-ni NPP dolo napangani gimin Phulbari jolni bang•a manderang aro una chakgiparang kusi ong•bee, AT Mondal-ni noko tom•aniko ong•ate, Phulbari bajarona jinma re•jomaniko dakangaha.
Phulbari jolni NPP dilgiparang, “Chinga AT Mondal-ni kamko namnika, uni gimin pilakan apsan ku•monge, AT Mondal-ko cheatna kamrangko ka•anggen aro ua mikkang bilsini eleksino chechongmotgen. Ua saksa areatangni manderangna ka•sae dangdikgipa, darangkoba mikkang nitegijagipa, a•jatangko namroro silroroatna rake kam ka•gipa mande ong•a” ine NPP-ni dilgiparang kobor ra•timgiparangna aganaha.