Shillong, August 30, 2022: South Garo Hills a•jani Dippu Ch Sangma unbaksana Kishan Lyngdoh mang sakgni North East Zone Team-o kal•na seokako man•enba, Duleep Trophy-o bakko ra•anggen.
Unbaksana Meghalaya a•dokni Chiang D Shira side manager ong•e bakko ra•angskagen ine parakataha.
Dippu Ch. Sangma ge 45 domestic match-rangko Meghalaya a•dokna BCICI tournament-o kal•angaha. Ua Ranji trophy-o century changsa, first-class Ranji Trophy-o changgni-half-century aro 50-Over-o Vijay Hazare Trophy-oba century man•aha. Ua Ranji Trophy, Vijay Hazare Trophy aro T20 Syed Mustaq Ali Trophy-oba sak 40 wicket-rangko man•aha.
Lyngdoh, Meghalaya Cricket dolni gital kal•rimska ong•a. Indiba ua 2021 bisio Syed Ali Mustaq Trophy-o kal•ani somoio chang 5 inning-o 247 run-rangko man•aha, unbaksana 147 strike rate-o 350 run-rangko man•aha.
Duleep Trophy ian First Class Knockout Tournament ong•a. Ian skanggipa changna North East Team-o kal•na seokako man•aha. Assam aro Tripura East Zone-o kal•angaha.
North East Zone-o kal•angna gita seokako man•gipa manderang gimikan NE a•jani rarasa ong•a. Indake uamang September 8 tarikoni West Zone baksa kal•susaanggen ine u•iataha.