Shillong, August 31, 2022: Hynniewtrep Youth Council (HYC) Monggolbar salni bako Ri-Bhoi a•jani Patharkhmah songo jingjengataniko ong•ate, Assam aro Meghalaya a•dokni soi ka•gipa MoU-ko jegale jima re•jomaniko dakangaha.
Indake jinma re•jomanio sima ari jolni manderang Khasi aro Garo apsan nangrime jingjengatanio bakko ra•e a•dokni Skotong Minister Conrad Sangma, Jirang elekka-ni MLA aro sorkarini appoint ka•ako man•gipa Regional Committee-ni membor-rangko jera ra•na ra•biangaha. Sima ari jolo songdongenggipa bang•a manderang MoU-ko jegale Conrad Sangma-ni kamko jegale suk ong•gijaniko parakangtokaha.
Monggolbar salo ong•atanggipa jinma re•jomanio HYC-ni dilgiparang, Conrad Sangma aro Himanta Biswa Sarma-ni kamko raken jegalangaha. Conrad Sangma indakgipa dal•a ja•kuko de•na skang songni nokni manderang, a•ani nokgipa Nokma Sordar-rang baksa agan golpogrikchengna nanga ineba matnangaha.
MDA sorkarini dilgiparang changni chang batanggipa gitcham sorkariko dos gale aganne pa•sikronga aro Congress sorkarini 2011 bilsio pakwatako man•gipa songrangko Meghalaya a•doko ra•napjaha ine aganchakskaengachim.
HYC, Skotong Minister-ni aganchakanina kusi ong•gijaniko parakangaha. Unbaksana uamangni RTI ka•e ma•siani gitade, Sector 6-ni ning•o donggipa Baklapara aro uni wilwilao donggipa songrang Meghalaya a•dokni ning•osa ga•aka. Indiba NPP sorkari Jimbrigaon aro Lyngkhung songko Assam-na pakwataha ineba parakataha.