Shillong, Jan 14, 2023: Political dilgiparang seokako man•na skang ku•chakgiminrangko, seokani ja•mano chu•sokatrongja, mongsongbate kattachi aganatgenchimode, “Me•chikrangko bil gnangatani” bidingo ku•chake on•anirang. Meghalya-o songdonggipa me•chikrang dingtang dingtang neng•nikanirangko man•a, jekai rongtalgipa chirangko ringna man•gijani aro MMR, jeko agangenchimode, bi•sa an•pakani somoio bang•a me•chikrang sia.
Indiba MDA Sorkarini sasono dingtang dingtang kamrangko ka•e MMR-ko komiatna man•aha aro sanchakram biaprango bi•sa an•pakaniko bang•bate dakna man•aha.
Meghalaya a•dokara me•chikko noko dongipa ong•ani gimin, me•chikrang me•asarangna bate janggi tangani cholrango, tangka-paisa jakkalani bidingo bang•bata bilrangko man•a aro me•chikrang darangoba pangchakgija ja•atangchi chadenge janggi tangna man•a. Indiba Meghalaya-o me•chikrang bang•a neng•nikanirangko man•ne janggi tangna nangenga, jekai pora-skiani, dilgipa ong•e kam ka•ani, nangchongmotgipa an•seng-baljokani cholrangko man•ani (bilsi sokgija an•o kegiparang bang•en donga), MMR-ni bang•a bi•sa an•pakani somoio ma•giparang siani aro rongtalgipa chirangko ringna man•ani.
A•doko songdonggiparang 50%-ni gita me•chikrangan ong•a aro uamang bang•a somoion dingtang dingtang neng•nikanirangko chagronge janggi tanga jekai kangal-cholgriani, an•seng-baljokanina nangchongmotgipa simsakani cholrangko man•gijani aro bang•a somoirangon, uamangni segiparang churing-chupeke siangani a•selo hajirarangko ka•e nokdangko alduna nangani.
Meghalaya-o NPP-ni dilenggipa sorkari a•doko songdonggipa me•chikrangni neng•nikanirangko nike dingtang dingtang cholrangchi uarangko namatna gita kamrangko ka•enga aro iarangko dakengon, me•chikrangko nie dongaigiparangsan ong•aigija me•asarang gitan apsandake namroro-silroroaniko ra•bana man•gen.
Me•chikrangko bil gnangatna aro uamangna dingtanganiko ra•bana pilak kamrangon, me•chikrangko bang•bate bak ra•atna nanggen aro tangka-paisani bidingo darangoba pangchakgija an•tangan chadengna man•aniara me•chikrangko bil gnangatani mingsa mongsonggipa chol ong•a ine Meghalaya sorkari chanchiaha.
Ia miksonganiko gisiko donne, Sorkari a•doko SHG-rangna kam ka•aha aro SHG-rangko bang•bate bikotna gita tik ka•aha, jedakode songo donggipa me•chikrangni janggi tangani gadangko namdapatna man•gen.
Songdonggipa manderangni kam ka•anichi aro sorkarini dontonggija kam ka•anichi, SHG-rangko bikotanichi namen chu•sokaniko man•aha aro COVID sabisichi neng•nikaniko man•genchimoba, sorkari lak 4.2 me•chikrangko didie ge 43,000 SHG-rangko bikotna man•aha aro ian batanggimin bilsi 4-o SHG-rangko bikotani changsni bataha ine parakaha.
Ia SHG-rangna dingtang dingtang kamrangko jako ra•e ka•na gita dakchakanirangko on•aha, jekai bang•gija tangkarangko loan ba srona on•ne dokkanrangko kulina, me•su baganrangko dakna, ba•ra dokgiparangna kidding brena aro uandakgiparang.
Meghalaya-ra a•briraragipa a•dok ong•a aro bankrangko jakkalani cholrang komiani gimin, manderang, mongsongbate songo noko donggipa me•chikrang ma•mong aro a•dok sorkarini scheme-rangoniko bang•a man•gnirangkon, man•jaengachim aro manderang chel•bea ramarangko songreesa jillarangona re•e an•tangtangni account-rangko kulina nangachim.
Sorkarini Jan Dhan Yojna chel•ao donggipa songrangona sokangkuja aro bang•a manderang ia scheme-ni namgnirangko man•kuja.Ia neng•nikaniko namatna, Meghalaya Sorkari Banking Correspondents (BC) model-ko a•bachengataha, jedakode ia bankrangko chel•ao aro diltugipa songrangona sokatna gita man•gen.
Sak 1000-na bate me•chik BC-rango a•dokni dingtang dingtang biaprangko rakkiaha aro uamangan bankni kamrangko ka•na gita chel•ao aro diltugipa songrango donggipa manderangna cholko on•enga ineba u•iataha.
A•dokni skotong minister, Conrad K Sangma, ia kamni gimin aganengon, a•doko janggi tangani gadangrang namroroaniara me•chikrangni bang•bate bak ra•anichisa ong•gen ine janapataha.
Skotong ministerni bebera•ani gitade, namgipa sasonko ra•baanichi me•chikrangni chagrongenggipa bang•a neng•nikanirangko namatna gita man•gen aro iani gimin 50% seatrangko Village Employment Council (VEC)-rango me•chikrangna on•na Sorkari raiko on•aha.
Ia ja•ku de•ani me•chikrangnasan bilko on•aia ong•ja, indiba pilak scheme-rangko nama dakbewalo ka•enga ine nikna man•gen.
Meghalaya-ni biaprang ga•nangja aro a•dokni bang•a biaprangon me•chikrang chel•a ramarangko re•e chirangko ko•na nanga aro bang•a chiring chibisikrang chel•gipa biaprangosa ong•ani gimin, bang•bata me•chikrangnan neng•nikani ong•a.
Uni gimin sing•sandianirangko dake, ia kamrangko ka•e neng•nikanichi bang•a chatrirangan skulo poraianiko dontongatako man•aha. Me•chikrangni ia neng•nikaniko komiatna, Meghalaya Sorkari ia kamko mongsonggipa dake ra•aha aro nokprakona chi sale on•na krenge kamko ka•aha.
Me•chikrangni janggi tanganiko namdapatna, Sorkari a•dokni ge 2,80,000 nokdangrangna jokenggipa chirangko batanggimin bilsi 5-o sale on•aha. Bi•sa an•pakani somoio ma•giparangni siani dal•bea jajrengani ong•achim, maina bang•a ma•giparangan bi•sa an•pakani somoio sanchakram biaprang dongjani a•sel janggi galna nangaha.
Indiba, NPP-ni dilenggipa sorkari dingtangmancha tarigimin technology-ko jakkale ia neng•nikaniko namatna kam ka•aha aro MOTHER appko a•bachengataha.
Ia app-chi an•o kegipa ma•giparangni dingtang dingtang gadangrangko nina gita jakkala aro health worker-rangna an•o kegipa ma•gipani bidingo nirokna gita cholko on•a aro dingtang dingtang nanganirang jekai samrang, kengnio ga•akgiparang aro uandakgiparangko u•ina gitaba dakchaka.
Ia app baksa, sorkari dongchakchengani nokrangkoba tariaha aro salrurana garirangko tik ka•aha, jedakode diltugipa songrango donggipa an•o kegipa ma•giparangko rimbae nambata simsakani aro sanna-banani cholrangko on•na man•gen.
Ia kamko ka•anichi ma•giparangni sianiko komiatasan ong•aija, indiba sanchakram biaprango bi•sa man•aniko bariataha.
Lak 2.2 ma•giparangna baten ia kamrangchi namgniko man•aha aro MMR ba ma•giparangni bi•sa an•pakanio siani 35% komiaha aro sanchakram biaprango bi•sa man•ani batanggimin bilsi 4-o 46% ong•aoni da•o 61% ona bariaha.
Ia pilak kam ka•anirang a•doko songdonggipa me•chikrangna namen dingtanganiko ra•baaha. Iarangko chu•sokatanira a•dokni skotong minister Conrad K Sangma-ni NPP sorkariko dilanichi ong•aha, jeni miksonganian “Darangkoba watchanggija” silroro-namroroanina re•ani ong•a. Namgipa sanna-banani chol, tangka-paisa man•ani, nambata janggi tangani gadang aro dilgipa ong•e kam ka•anirangko man•ne, Meghalaya-ni me•chikrang silroro-namroroanio gitalgipa nichaksoaniko nikaha ine MDA sorkarini pilak kamrangko nipilate chu•sokgiminrangko parakataha.