Jengjal Farmers’ Market-ko nokdonggae on•a

0

Tura, January 15, 2023: Health and Family Welfare, Food and Civil Supplies, Taxation aro I.P.R Department-ni Minister James Pangsang K Sangma Sonibar salo Jengjal Farmers’ Market-ko oprake on•angaha.

Jengjal song Tura-oni Jengjal-ona km 36 mangna chel•gipa songo Farmers’ Marrket-ko rikna gita James Sangma 2021 bilsio pangchakani ro•ongko songe on•ahachim. Ia game ge•e chagiparangni anti NH-51 soroksamo donga. Ia bajarko matchote rikna gita Ma•mongni Ministry of Tribal Affairs tangka paisarangko on•ataha.

Ia kamko matchotatna gita tangka gong kror 9 lak 82 tangkarangko jakkalaha. Ia Farmers’ Market-ko 2020 bilsini January jao rikna a•bachengaha. Ia project-ko rikanio West Garo Hills-ni District Rural Development Agency (DRDA), Nodal Department ong•e kamko ka•enba matchote rikna man•aha. Ia bajarko bak 5 dake suale, ge 34 kuturirang donga, unbaksana garirangko donna parking bay-ko donaha. Uasan ong•aigija rest-room me•a aro me•chikna dingtang paikanako tarie on•aha.

Game ge•e cha•giparangni bajar ba building, a•jao man•gipa pilak me•su samjakrang aro rokomanti bosturangko maming neng•nika gri palchina miksongenba rikaha. Ia bajar, Jengjal-ni SHG ba manderangsan ong•aigija samtangtango donggipa songni manderangna dakchakanirangko on•gen. Ia bajaro donggipa storehouse ba godown-rango gue, kesunat, e•ching, gulmoris aro uandakgipa rokomanti bosturangko donchake gipin a•dokchina badingchiwalna gita man•gen.

James Sangma tom•anio aganprakengon, “Ia building-o darangba maming neng•nikaniko man•jachina miksonge rikaha. An•chingni Meghalaya a•doko indakgipa game ge•e cha•giparangni bajaro building ge 3-san dongaia. A•dok sorkari pilak game ge•e cha•giparangna nama gadango janggi tangna dakchakani ong•gen. Game ge•e cha•giparangna dakchakaniko on•na gita sorkari FOCUS aro FOCUS+ ko ra•bae on•aha, jedakode game ge•e cha•an baksa jilla ka•anirangko jelbra jelsruate pale sim•e cha•na gita man•gen. A•dokni 70% manderang agriculture ba gama ge•ano ka•donge janggi tangenga. Game ge•e cha•giparangna ia bajarko sorkari ka•sae rike on•aha. Uni gimin ia bajarko an•tangni noktang bajartang dakenba pale sim•e cha•na man•gen” ine aganangaha.

James Sangma apsan salon Jengjal-o Khelo India Scheme-ni gita rikgipa Jengjal Multipurpose Indoor Sports Stadium-naba pangchakani ro•ongko songe on•angjolaha. Ia Stadium-ko rikna gita tangka gong kror 8 lak 53 tangkarangko chamataha.

Ia tom•anio MDC Grahambell A.Sangma, DRDA Project Director Dolrich Berin G Momin, Jengjal Civil Subdivision-ni SDO Leena Sangma bakko ra•angaha.

Leave A Reply

Your email address will not be published.