Williamnagar, June 18, 2022: Ja•manchake kobor man•soani gitade, East Garo Hills a·jao a·ana kajia ong·e mande saksako so•otani gimin Bristibar salo dos dakgipa mandena kachari (Court), janggi tanga gimik pattoko donchina rai on·aha.
East Garo Hills a·jani Superintendent of Pulis (SP) Bruno A Sangma-ni u·iatani gitade, batanggimin 2018 bilsini June 26 tariko, Sengran D Shira, East Garo Hills a·jani Cheran Alda songo, a·ana kajia ong·e, Balkulin Ch.Momin-ko so·otahachim. Indake ia mandeko so•otna jakkalgipa silchi dareko man·ani ja·mano pulisrang, dos dakgipa mandeko rim·e uni kosako mokordomako ka·ahachim.
Uandaken, Bristibar salo, East Garo Hills a·jani District & Sessions Judge M Skhemian, Sengran D Shira-ko dosi channe, uko janggi tanga gimik pattoko donchina raiko on·aha.