Mande rim•srukgipa sak 4 manderangko pulis rim•a

0

Tura, July 4, 2022: West Garo Hills a•jao mande rim•sukanggipa sakguttam manderangko rim•aha ine West Garo Hills a•jani SP, VS Rathore parakataha.

Selsella Pulis Outposto koborko man•soani gitade, June jani 30 tarik attamni 5:30 bajimango Sakmal songni Nur Alom, Kandergaon songni Nazidur Islam jemangan Rajabala Pulis Outpost-ni ning•o ga•akgachim, uamang mande saksako Haldibari songo cha•drape uamangni gario rim•sruke ra•angna jotton ka•ahachim. Indiba ua rakbee jokna jotton ka•anichi uamangni jakoni jokna gita man•aha.

Ua mandeni paraka gitade, ua Selsella Block Office-o ong•atgipa tom•anio dongpae noktangchina re•angpilengachim. Indake ua apsan salon, apsan manderangan skanggipa chango rim•srukna man•jae gnigipa chango, Haldibari aro Babetpara songni rama bijangchio rim•sruktaina jotton ka•aha, indiba sakgittam manderang ua obostako nikchange uko naljokate uni nok Rajabala-ona rimange doneaha.

Ua koborko man•soani bakan Tura Pulis Station-o ia obostani bidingo mamlako segataha aro Sub-Inspector Rhenius A Sangma, ia case-ko jako ra•e sing•sandianiko dakaha.

Indake ia case-o jak donggipa sakgittam manderangko pulisrang Robibar attamo rim•aha. Rim•a man•gipa manderanga bilsi 23 ong•gipa Nur Alom aro Nazidur Sheikh aro bilsi 22 ong•gipa Moshaidul Sheikh-ko rim•aha. Ia obostani bidingo chargesheet-ko ta•raken watatgen aro dos dakgipa sakgittam manderangko Court-ona watatgen ine u•iataha.

Gnigipa obostao, rim•srukako man•gipa ma•ningsa sakgniko Robibar attamni bako Assam a•dokoniko jokatna man•aha ineba u•iatha.

Re•anggipa June 22 tariko Phulbari Pulis Outposto kobor man•soani gitade, salgnina skang Rongkhon bajaroniko ma•gipa saksa aro bilsisa atha ong•gipa bi•sako u•ina man•gijagipa manderang rim•srukangaha. Koborko man•soani bakan Tura Women PS-o badi ka•e mamlako segataha aro ia case-ko WPSI Chemetengsil A. Sangma-na pakwatataha.

Iani bidingo sing•sandianiko dakon, uamang ma•ningsa sakgniko Assam a•dokni Dhubri-ona rimangenba Bilasipara Pulis Station-ni ning•o ga•akgipa Beltuli songo donnue donaha ine u•ina gita man•aha. Uamang ma•ningsako naljokatna WGH a•jani pulis aro Dhubri Pulis bakrime Joint Operation-ko ka•aha. Indake rim•srukanga man•gipa ma•gipa aro degipako Sombar pringo Tura songjinmaona rimbapilaha. Uamang sakgniko rim•srukanio jak donggipa bilsi 23 ong•gipa Moni Zaman-ko rim•aha aro Court-chi watataha. Ua Phulbari, Shyamding songoni ong•achim.

Rim•srukanggipa Moni Zaman, ua me•chikni nokdangni manderangko changni chang ka•mikennate roengachim. Indake ia bilsioba ua changgittamna kingking March 31, April 8 aro April 9 tariko skatang kajia a•bote golmal ka•e roaha ineba u•iataha.

Leave A Reply

Your email address will not be published.