Ranikor, July 4, 2022: All Khasi Hills A•chik Federation (AKHAF) Headquarter Shillong-ni President Claefstar Ch. Marak, dukni salo jaksrambee dakchakatgipa manderangko jinmani palo mittelataha.
Re•anggipa June 16 tariko South West Khasi Hills, West Khasi Hills aro East Khasi Hills a•jani bang•a biaprango mikka dondikgija jimbee waani a•sel bang•a manderang janggitangko gimaataha aro bang•a manderang nokgri jamgri ong•aha. Bajar anti re•e salantio nanga bosturangko brenaba bajar anti gimikkon chi sripani gimin maming bosturangan dongjaha.
“Chingni duk mikchi ong•e mipal palsana ka•oksimiting somoio, chingna bang•a manderang jaksrambee dakchakanirangko on•ataha. Garo Hills a•jani mitam manderangba chingna ka•sae salantio cha•ani ringani bosturangko on•gilataha. Mikka jimbee waani a•selo rama jal•langrang nosto ong•ani gimin garirang re•na man•jaha, indiba a•dok sorkari sildoreng gita chingna dakchakanirangko sokataha. Indake sildoreng salo changgni, changgittam bilanga bilbaa dake salanti nanga bosturangko jinmana suale on•angaha.
Anga jinmani palo a•dokni Skotong Minister Conrad Sangma, Gitcham MLA MM. Danggo, NGO-rang, Giljani manderang aro gipinrang dakchakaniko sokatgipa pilakkon mittelpilna sika” ine Claefstar Ch Marak aganataha.