Shillong,July 4: Adhoc skigiparangni dormahako bariatna Cabinet Sombar salo tom•e chanchiaha. Adhoc skulini skigiparang uamangni dormahako bariatchina jingjengatanirangko dakengachim.
Skotong Minister Conrad Sangma Cabinet Meetingni ja•mano kobor ra•timgiparangna aganani gitade, Higher Secondary, Secondary aro Hindi skigiparangna gong hajal 9,000-ko bariatgen, una agreba Upper Primary (UP), Lower Primary, Science skigiparang aro SSA-ni 4-gipa skigiparangna gong hajal 6,000-ko bariatskagen ine aganaha. Unbaksana, bilsio 5%-ko bariatchina dabiani giminba cabinet chanchiangaha.
Dingtang dingtang category-ni adhoc skigiparangna apsan dormaha gong hajal 18,000-ko on•china aro adhoc skulrangko skulrangona ra•doate deficit grant-rangko on•china skigiparang dabiengachim.
Skigiparangni dormaharangko bariatna gong kror 100-ko Financial-o napatgen ine Skotong Minister parakataha. Ia dormaharangko July 1 tarikoni on•anggen ineba parakataha.
Da•o Higher Secondary skulni skigiparang japrako gong hajal 33,000, Secondary skulni skigiparang japrako gong hajal 29,000 aro Science skigiparang gong hajal 31,000-ko man•gen ineba parakataha.
Indake ong•engon, UP skigiparang gong hajal 22,000-ko man•angskagen, LP skigiparang gong hajal 18,000, Hindi skigiparang gong hajal 18,000 aro 4-gipa skigiparang gong hajal 18,000-ko man•gen ine parakataha.
Indake ong•engon, Sombar salo Cabinet chanchie, higher secondary, secondary aro science skigiparangna gong 9,000 aro UP, LP aro Hindi skigiparangna gong 6,000-ko bariatgen ine tik ka•aniko jingjengatenggipa adhoc skigiparang jegalate uamangni chu•ongnikgijaniko parakatenba, FASTOM Monggolbar salo chanchianiko dake dingtang ja•kuko de•anggen ine Sombar salo parakatskaha.