Tura, Feb 18, 2023:Tura-ni BJP MDC Bernard N.Marak tom•anio jinmana aganprakengon, Meghalaya a•dokko man•chengaoni da•o bilsi 50 gapaha. Indiba bang•bata gittimrang aro biaprangon, development bilongen ja•man chakenga, mirong mechu, ringani chi, bijoli, rama jal•langrangba da•alo bilongen ja•manchakenga.
Na•simang da•alo ia tom•bimongaona kusi ong•e aro ka•sroke, re•chakatbaengon, dingtang dingtang kattarangko gipin dolni manderang, aganne dal•dalgipa dilgiparangni re•bae agan-talataniko knaatna sikjae, kenjagokatenga. Kristian-ni kosako, jatni kosako chakatgipa, Sixth Schedule-ko bon•atgen, ine kenate jajaatgiparang bilongen bang•a ine aganaha.
Indiba Garo Hills-ni ma•gipa, pagiparang, chadamberang sakantian mikgaoaniko mesokna da•alo tom•dakenga. Da•al ia meetingona bang•a garirang re•bana man•gija jachange dongenga. Manderangni re•bana gisiko sikaniko bringbrangate ka•o nangatenga, kontasa, kontagni traffic jamp ong•ani gimin, manderang suk ong•gijaniko parakataha. Sorok paksako bon ka•e donenga, indiba ma•a paarang sakantini ku•mongani re•baenggipa election-o bite gnanggipa ong•gen ine Bernard Marak ka•donganiko parakangaha.
Re•anggipa bilsi 5-o BJP-ni ka•saani aro ka•donganiko man•ne, South Tura-ni MLA, jekon Skotong Minister-ni gadangona bilko on•aha. Pilak Prime Minister-ni a•bachengatgipa, Scheme-rangko nokanti, songantiona sokatna gita uni daito ong•achim. Chi, rama, bijoli, ration iarangko, an•chingna indin on•atenga. Indiba Garo Hills-ona sokbaani ja•mande, iarang gimikan dam dongaijok. Indin on•ani pal sinjetaniko ra•baskaa. Kangal nokdangrang jemangan, an•tangtang nok rike dongna man•jaengachim, uamangna indin nok rike on•na gita Town areao kror 1 lak 50-ko on•ataha, Tura-oba nokdang ge 619-na bate ia scheme-ko man•paachim. Indiba Tura-o, ia scheme-ko ra•ode, na•simang nok namao dongna man•gen, ine namnikjae, bikpilsa na•simangko contractor gita, na•song an•tangtang nokko rikbo, na•song nok rikmanosa tangka on•gen ine aganskaenga ineba talatangaha.
Jemangan an•tangtangni nokko rikna man•jaengachim, uamangna on•atgipa scheme-ko kal•ake, nokdang ge 619-oni ge•sa nokoba matchotjaha ineba janapangaha. Chi jokatna gita, bang•a tangkarangko on•atjok, Tura Water Supply Scheme, ge•sa town areao chiko sokatna gita a•bachengataha. Indiba da•alo Tura songjinmao bang•a biaprang, gittimrangon man•gija dongkuenga.
Una agreba, Tura songjinmao songdonggiparang, sak 100-oni sak 40-de, sorkarini a•ao dongenga ine, pilak man•na nanganirangko champenge donenga. Uamangko pangnan sorkarini a•ao dongenga ine sinjetaniko on•enga. Uni gimin ma•gipa pagiparang anga na•simangna agangen, Tura-o sorkarini a•a ain gita ra•gipa dongja. Ain gita ra•gipa ine aganon, Acquisition ka•gigimin a•arang dongja, Requisition ka•gipasan dongaia. Sorkari Nokmana kajinako game, ua a•ako jakkalchenggen inesa ua a•arangko ra•achim, indiba election sepangode, na•simangna Patta on•genna, nok rike on•gen ine aganenba vote-rangko salna jotton ka•enga ine Tura-ni MDC talatangaha.
Sorkari patta on•na gita bil man•ja, Sixth Schedule areao sorkari patta on•na bil man•ja. Sorkarini a•a ine na•simangna document on•na Sixth Schedule-ni Constitution-o pangchake, champenga.
Uni gimin ma•a paarang, da•o bang•a arearang jekai Nikwatgre, Ronggi Songgital, Diringga ia jolrangko sorkarini a•a ine a•kangenga aro patta on•gen ine ku•chakenga. Ia sorkarini a•a ong•genchimode, sorkarini a•a ine sakkiko on•na nanggen. Gazett-o sorkarini a•a ine aganja, “the government elect to resume on the terms of the read instead of acguiring under the Act”, Ain gita brekamana bate kajinako game jakkalgen, inesa agana ineba talatangaha.
Uni gimin sorkarini tangkako ra•genchimode, sorkarini a•ao dongenga ine ra•chakani ga•aka, iako ra•chakna nangja. An•chingde A•chikrangsa, a•ani nokgiparangsa sorkarini ning•o donggipa ong•ja. An•ching a•ani nokgiparang ong•a. Nokma document on•genchimode, uan permanent a•ani document ong•jok, patta on•gipade bilsi 10 prako gital daktaina nanga. Sorkari maming saloba patta on•na man•ja, Sixth Schedule jolode. District Council-ni through record-ko rakkina man•a, indiba a•ako on•na man•gipade, Nokmasan ong•aia. Da•alo ia bilko aro Nokmarangni bilko aro traditional system-ko gimaataniko bilakattaina BJP ja•ku de•enga, BJP bilakattaigen ine Bernard Marak ku•rachakangaha.
Nokmarangna bilsio tangka gong lak 10-ko on•gen ine ku•rachakenga, an•tangtangni jolko develop ka•china. Indiba an•chingko bobil dakenggipa party, maiko aganenga, Sixth Schedule-ko aro toromkoba bon•atgnok ingipa politics-sa ong•aia ine Bernard Marak agan talate on•angaha.