Tura, February 18, 2023: Chang 29-gipa Karbi Youth Festival-ona GSMC Tura HQ-ni Additional General Secretary Bostone M Sangma mongsonggipa ong•e re•angaha.
“Anga aro angni ka•rimskarang ia biapo na•simang baksa tom•anio bakko ra•na man•ne bilongen kusi ong•a. Indake anga GSMC-ni aro Garo Hills-ni namgipa salamko Karbi songni pilak manderangna on•na kusi ong•a. Chinga Karbi jatni dingtang a•dokna dabianio uamang baksa bakrime kamrangko ka•anggen. Uamang an•ching A•chik jat gitan dingtang a•dokko dabienga. Batanggipa 2022 bilsini December 14 aro 15 tariko chinga, National Federation for New States (NFNS)-ni bimango New Delhi songjinmaona re•ange, Garoland aro Karbi Anglong State-ko dabiangaha” ine Bostone Sangma u•iataha.
A•chik jatni aro Karbi jatni melie nangrime aro tom•tome dongkamna re•baenggipa sal somoirango ku•cholsan kamko ka•e miksongatangko dabianggen ineba parakataha.