Shillong, Feb 17, 2023: TMC National General Secretary Abhishek Banerjee Butbar salo Tura-ona re·bae jinma re·jomanio bakko ra·angaha. Ua jinma re·jome election-na campaign ka•ani ja·mano, Tura bajaro tom•aniko ong•ate, TMC-na vote on•china didiangaha.
Abishek Banerjee-ni agananio, “Na·simang vote pu·onengon ba sikdepengon, Trinamool Congress-na pu·onna ong·ja, indiba Mamata Banerjee-nasa pu·onnenga,” ine aganangaha.
Na•simang sakantian Mamata Banerjee-na pu·onnenga ine gisik ra·china gita aganangaha.
Ian AITC-ni agangiminko dingtangatani ong·a, maina re·anggipa jao Garo-rang Garo Hills-ko aro Khasi-rang Khasi Hills-ko sason ka·gen ine aganahachim ine NPP janapataha.
“Meghalaya-o kakket dilgipako nangenga, jean Delhi aro Guwahati-o asonge an·tangtangni dilgiparangna chroktimgija manderangna chadenge kakket dakgrikgen,” ine Abhishek Banerjee aganaha.
Iani bidingo NPP-ni agantimgipa Bajop Pyngrope aganchakatengon, AITC-ni dilgipa ong•e, indakgipa kattako agananina maming jagokani ong·ja ine janapatskaha. AITC-de Bengal-ni party-sa aro gipin a·dokrango mai ong·aha, an·ching nikmanaha, jekai Tripura-ni manderang a•bachengode, AITC baksa bak ra·ahachim, indiba election matchota bikan Tripura-ni manderang ong·kattokaha. AITC maming dakeba Meghalaya-o chu·sokjawa ine u·ie, TMC kentimake, Mamata Banerjee-na pu·onchina gita aganenga ine anga bebe ra·a ine Bajop Pyngrope janapataha.
AITC-o bakko ra·gipa manderang election-ni ja·manon watgalgen, ine Meghalaya-ni manderang u·ia. Mamata Banerjee-na pu·onaniara Meghalaya-ni manderangna maming saloba namgipa ong·ja aro namen u·isamsoe aganna am•gipa kattasa ong·a. Social Media-o watatgipa video-ko nigenchimode, Mamata Banerjee Meghalaya a•doko donggipa jatrangni bimingrangkon man·ja ine nikna man·gen aro una vote ka·na agananiara ong·na ampilgijagipa miksongani ong·a ineba janapataha.
Abishek Banerjee, Mamata Banerjee-ni depante nanggipa, chong·motan, NPP TMC-ko aganna changantian janapenga aro ian TMC bilsi 2-ni gisepo badita bilakaniko man·a uko mesoka. Kobor ra·timgipa, Bajop Pyngrope-ko aganchakchina aganengon, NPP-ni nama bimingko mesoka, maina mongsonggipa opposition dolan uamangni bimingko janapanina kusi ong·enga ineba aganchakataha.
Election-ara pangnan party ge·gni ba una bate bang·ani gisepo dakgrikani ong·a. Indake dakgrikanio, NPP-ni manderangko AITC-ni kengnirangni gimin, janapna nangani dongja, maina TMC party re·anggipa bilsisana skangan a·doko dongjachim.TMC da·o Bengal-ko nosto ong·ataniko manderangna da·o parakatna nanga ine
Mamata Banerjee-na pu·onnaniko Meghalaya-ni manderang basejawa ineba agandapaha.
AITC an·chingni manderangko tol·gipa ku·chakanirangko on·ne, tangkarang on·aniko dakna, janggi tangani cholrangko on·na aro iani palo Mamata Banerjee-na pu·onna ropaniko daknaba donga, mande saksaba AITC-na pu·onjawa. Mamata Banerjee an·tangan West Bengal-o ama cha·aha aro election-o chena gita bye-election-ko sengna nangaha ine na·simang u·iama ine sing•doangaha.
West Bengal-ni manderangan una pu·onjagenchimode, Meghalaya, Tripura aro gipin a·dokrango sawa una pu·ongen ineba Bajop Pyngrope sing•doangaha.