Shillong, January 12, 2022: Ma•mong sorkari Meghalaya a•dokna Jal Jeevan Mission Scheme (JJM)-ko dontongatja, je chamatgimin tangka gong kror 3,000-ko maming dakeba dontongatja ine parakataha. Monggolbar salo ‘The Shillong Times’ songbad-o “Ma•mong Sorkari Meghalaya a•dokna chamatgipa kror 3000 JJM Scheme-ni tangkarangko dontongataha” ingipa katta kakket ong•ja, tol•e gatatanisan ong•aia ine Public Health Engineering (PHE) Minister, Renikton Lyngdoh Tongkhar parakataha.
“The Shillong Times Songbad Monggolbar salo chappa ka•anio, ma•mong sorkari Meghalaya sorkarini a•doko JJM Scheme-ko re•anggipa jao tik ong•e kam ka•jani bidingo aganchakaniko nangnike lekka seataha, indiba a•dok sorkari da•ona kingkingba uamangni sing•atanina aganchakjani a•selsa JJM Scheme-ko Meghalaya a•doko dontongataha ine seataha. Iarang gimikan tol•gipasa ong•aia maina chingna da•ona kingkingba New Delhi-oni dontongatani gimin mamingkoba u•iatani aro mikrakataniko parakkuja. Meghalaya sorkari a•doko JJM Scheme-ko namedake nirok sandienga aro lakh 2 nokdangni sa•raona piperangko teke on•e chirangko sokate on•na man•aha” ine PHE Minister agan-talataha.