Tura, March 14, 2022: Education department-o kam ka•gipa Pa Osim D.Marak re•anggipa 2019 bilsini October 18 tariko ka•tongni sabisiko man•ne an•tangni ka•sagipa jik dedrangko wate jringjrotna neng•takram biapona re•angaha.
Osim D. Marak 1995 bilsio sorkarini kamna seokako man•ne Lower Primary (LP) Skulo bilsi 30-na skigipani kamko ka•aha. Indiba sorkari Osim Marak-ni jikgipana da•alona kingkingba uni man•gnigipa tangkarangko aro pension-ko on•kuja ine Osim Marak sagini depante Chegan N Marak u•iataha.
“ Education Department, angni pagipa sagini man•gni tangkarangko aro pension-ko angni ma•gipana sal 90-ni gisepon on•gen ine ku•rachake ra•chakahani gimin, angni ma•gipa Hirabell N Marak re•anggipa 2021 bilsini September 15 tariko Lok Adalat-o soi ka•aha. Indiba da•alona kingkingba angni ma•gipa Education Department-ni sal 90-ni gisepo on•na ku•rachakgimin tangkarangko man•kuja. Sorkari angni pagipako aro nokdangni manderangko kal•ake roa gita chacha ong•a. Angni ma•gipa kam gri angni pagipaosa ka•dongachim. Indaken duk mikchi ong•e kam dongjae nokdangko chalaina, bi•sarangko poraitna aro nokni nanga korosrangna neng•skime aro sko sa•dike dongenggipa angni ma•gipa sao ka•donganiko man•gen, sorkariba sal 90-ni gisepon chu•gimik tangkarangko on•gen ine soi ka•ate da•alona kingkingba on•chipkuja. Angni ma•gipa da•alona kingkingba uni man•na nanggni tangkarangko sorkarioniko dabienga.Indiba sorkari ching nokdangni manderangko duk mikchi ong•atgija man•gni pilak tangka paisarangko on•na nanga” ine Chegan Marak janapataha.