Bilsi 23 ong•piloba sorkari chingni dabianiko knachakja:Tengsan Marak

0

Tura, March 14, 2022: GSU Western Zone North Dadenggre-ni President Tengsan M Marak, Meghalaya a•dokni gitchambatsranggipa Sub-Division-ko a•ja (district) songe on•china dabienba sorkarina lekka sedoataiaha.
“Chinga bang•a changon sorkarina lekka sedoate Dadenggre Sub-Division-ko a•ja songe on•china dilgiparangko mol•molahachim, indiba da•alona kingkingba sorkarini aganchakaniko man•kuja. Ia Sub-Division Meghalaya a•doko ge•sa gitchambatsrangipa Sub-Division ong•a, indiba sorakari Dadenggre-ko a•ja songe on•na gisik nangjaenga. Sorkari re•anggipa bilsini November 10 tariko Mairang Civil Sub-Division-ko gital a•ja, Eastern West Khasi Hills-ko songe on•aha. Sorkari Dadenggre-o songdongenggipa manderangni dabianiko knachake bimang pil•atna man•genchimode, chingni bilsi 23-na dabianiko maina knachakna man•ja. Chinga 1999 bilsionin Dadenggre Sub-Division-ko a•ja songe on•china dabienga. Chingni ku•rangko bilsi 23-na sorkari knachakja, indide chinga sao ka•dongbo aro Saniko dabibo” ine Tengsan Marak sing•doangaha.
Ia dabianiko 1999 bilsioni a•bachengataha, indake ua somoio Skotong Minister ong•enggipa Dr Donkupar Roy-na Memorandum-ko on•aha. Gnigipa chango, 2012 aro 2015 bilsio Dr. Mukul Sangma-ni Skotong Minister ong•mitingoba ia dabianiko ra•chakchina Memorandum-ko on•aha. Chinga ia dabianiko bimang pil•atna chingni Local MLA Pa James K Sangma-naba lekkarangko see una on•aha aro da•o ong•enggipa a•dokni Skotong Minister Pa Conrad Sangma baksaba agangolpogrike bimang pil•atchina mol•molaha. Indiba da•alona kingkingba chingni Memorandum-rangko dilgiparangna on•aniara indinsa ong•gramaia ineba GSU dilgipa janapataha.
”Dadenggre-ni Itihas-ko niatgenchimode, 1982 bilsion Dadenggre Sub-Division-ko songaha. Indaken 1999 bilsio ia Sub-Division-ko a•ja songe on•na kraa ine nikenba jinma apsan ku•monge dabianiko a•bachengaha. Dadenggre Sub-Division-ni ning•o ga•akgipa ge-6 elekkaranga Phulbari, Rajabala, Selsella, Tikrikkila, Raksamgre aro Dadenggre. Indaken ia sak 6 MLA-rangko mol•molna sika, na•simang apsan ku•monge chingni dabianiko bimang pil•atpabo. Dadenggre Sub-Division-ni apbala gimik 1,700 sq. km. a•arang gnang aro sak 3,61000 manderang gnang. Uasan ong•aigija skul ge 2000-na bate donga, kolege ge 5 ia Dadenggre Civil Sub Division-ni ning•o donga. Ia dabienggipa gital a•jani ning•o dam 4 Community aro Rural Development C&RD blockrang donga uaranga Dadenggre C&RD Block, Selsella C&RD Block, Tikrikkila C&RD Block aro Demdema C&RD Block. Una agreba ia dabienggipa a•jani ning•o Rongram Block-ni ge 15 GS Circle-oni ge 8 GS Circle-ranga Rongbakgre, Waram A•simgre, Marakapara, Aguragre, Anogre, Rombagre, Rongdengre aro Baljek A•gal. Ia chingni dabianirangko sorkari bimang pil•atna man•genchimode, bang•a chadamberangna kamrangba ong•katgenchim aro wilwilao donggipa songrangnaba bang•a dakchakani ong•gnokchim” ine GSU President janapataha.

Leave A Reply

Your email address will not be published.