Tura, March 13, 2022: Garo Hills a•jani A•chik Mahindra Pick-up Association (AMPA) dol, sonibar salo uamangni brigipa tombimonganiko Dodinanggre, Ganal biap o ong•atangaha. Ia tombimonganio Union Membor rang bang•en sokbatokaha aro uamangni dakna nanggni kamrangni bidingoba chanchirimangaha ine u•iataha.
Union membor rangni chanchie tik ka•anio uamang Goods Carriage Transportation Public Service ko ra•gatanio, to-ni dam rang barianirangko aro pilak salantio nanggipa bosturangni dam rang bariani a•selo gariko salenggipa Driver ni betdon koba bariatna nanggnok ine tik ka•e jinma ra•chaktokaha. Tura Bajar oni ICFAI ona, Home Science ona, Daldagre TMB gate ona, Poultry Farm Upper Rongkon ona changsa o gong hajar 1 ka•e ra•gen ine tik ka•aha. Uamangni tik kagimin Local Town Trip gong hajar 1 tangkarangko April jani 1 tarik oni ra•na a•bachenggnok. Daily Basis Para-ni bidingo chanchion uamang Garo Hills Region na salprako gong hajar 3500 ko tik ka•aha, unbaksana gari na to-ni dam aro Driver na cha•ani ring•ani koros koba on•a nanggen, unbaksana gariko Garo Hills ni a•palchi ra•angna chanchigenchimode salprako gong hajar 4500 ko on•an baksana to-ni dam aro Driver na cha•ani ring•anikoba on•a nanggen.Ia chingni chanchirimanirangko April jani 1 tarik oni ja•rikgnok ine u•iataha.
Ia tom•anio gitcham Union membor rangni term bon•ahani gimin gital gipa Union Executive Body ko songangskaaha.Todaniel D Sangma ko President, Pitson Sangma ko Vice President, Sengrak Momin ko General Secretary, Chubat Marak ko Additional General Secretary, Bernard R Marak ko Accountant, Cyclone Sangma ko Joint Secretary, Panseng R Sangma ko Finance Secretary, Najib Sangma ko Organising Secretary, Piush Sangma ko Labour Secretary aro Tinash Momin ko Adviser songaha. Executive membor ranga, Changran Sangma, Sengin M Marak, Waiting R Sangma, Ajith D Marak, Bamrik Sangma, Malseng D Sangma, Jasper N Sangma, Labith Marak, Bharot Sangma, Raju Marak maang ong•a. Ia gitalgipa Union aro Executive membor rang AMPA dolko bilsi 3 ona kingking chalaianggen ine ua koborko on•ataha.