Shillong, December 6, 2021: Khasi Students’ Union (KSU), December 4 tariko Nagaland a•dokni Mon District-o donggipa Oting songo dos gri Naga manderangko Assam Rifle sipairangni ka•saninggija goe so•otanina duk ong•aniko parakataha.
Assam Rifle sipairangni ka•namgija dake maming dos grigipa ramram manderangko chanchichipe goe galanichi somoi gri rang•gitik sak 13 manderang janggitangtangko gimaatna nangaha.
Ia obostao ga•ake dukko man•enggipa nokdangni manderangna KSU kalimpaaniko parakataha. Unbaksana Naga manderangko sinjetenggipa sipairangni kosako jegale, Naga jong-ada no-abirangna chakpae, uamangni dakgrikanio chadengpagen ine KSU parakataha.
Ia ka•namgijagipa Indian Army-rang NE a•dokni manderangko so•otan baksa kenjagokataniko on•ne rakgipa niam ba sasonko ka•na Armed Forces Special Powers Act (AFSPA)-ko ra•gatenba Indian sipairang an•tangni ska gita NE a•dokni manderangko so•otna, sasti on•na aro je mandekoba rim•e kal•steke rona bilko jakkepenga ineba matnangataha.
Ia ka•namgijagipa AFSPA-ni kenbegnigipa kamrangko India sorkari ta•rake ra•galpilna nanga aro tom•tomaniko ra•baan baksa NE-o songdonggipa indigenous manderangko niam gita chel•chakna nanga ineba KSU dabiangaha.
Uni gisepon India Sorkari mamingkoba knachakgija tribal manderangni kosako neng•nikaniko on•enggipa aro dos gri manderangni kosako an•chi pari ong•atanio jak donggipa Indian sipairangko niam gita sasti on•skana nanga ine KSU-ni President Donald V. Thabah janpataha.
KSU-ni chanchia gitade, Indian military sipairang Burma-o sason ka•enggipa Tatmadaw Regime-ko ja•rike NE-ni manderangko bilake sinjetna a•bachengatenga ineba janapataha.