Tura, December 10, 2021: West Garo Hills a•jao donggipa Balachanda songni sak 250 me•chikmarangni bakrime chalaienggipa Dondime Multi Purpose Co-operative Society (DMCS) Sukrobar salo Balachanda rama jangchio skanggipa changna Exhibition Cum Sales Day-ko ong•atangaha.
Ua program-ko ong•atani salo Rajabala-ni MLA, MD Abdus Saleh dal•batgipa sokgipa ong•e salsani program-ko oprake on•angaha.
Program-ko a•bachengatani salo DMCS-ni General Secretary, program-ona sokbagipa sakantiko rimchaksoenba, bak ra•gipa sakantina Balachanda aro uni wilwilao DMCS-ko a•bachengatani miksonganiko agan-talate on•angaha.
Uni jinmana agan-talatengon,
“Chingni Balachanda-o DMCS-ko a•bachengataniara, chinga cholgrigipa ma•giparang jolo dal•gipa chugipa bading chiwalaniko jako ra•e chalaipana man•jaoba, chingni a•barango ge•e game man•enggipa biterangko aro songo noko biltang jaktangchi tarigipa an•tangtangni changa sapachi sike moe man•pagipa rokkomari bosturangko pale sim•e cha•paachi chonbegipa bading chiwalani a•bakuko re•chakatna aro uarangko dondipgija kamko ka•achi an•tangtangni janggi tangani cholko nambata gadangona tang•doatna miksonganian ong•a” ine parakataha.
Uandake, salni dal•batgipa sokgipa MLA jinmana aganprakengon, “Ian angni MLA man•chengaoni skanggipa changna joltango dal•begipa program-ko ong•atgipao bakko ra•chenggipa ong•enga ine aganenba, Balachanda jolo DMCS-ko bikote an•tangtangni janggi tangani gadangko ra•doaniara gipinrangna namgipa dakmesokani ong•ska” ine aganangaha.
Uarangsan ong•aigija MLA, an•tangni bil ama dipet DMCS dolni me•chikmarangna mikkangchi dakchakaniko on•na gitaba ku•rachakangjolaha. Indake jolo songdonggipa me•chikma dolni dabianiao pangchake DMCS-na community hall-ko rikna tangka gong lak 2.5-ko dakchakna gita ku•rachakangaha.
Indake ong•engon, program-ona okamako man•ne sokbagiparangara District level Cooperative Society-ni officer, block level cooperative society-ni manager, dingtang dingtang department-ni officer-rang, jolni nokmarang aro gipinrang dongpaha.
Indake program-o dingtang dingtang chrok-mesaachi aro dakmesokaniko ong•atangajolaha. Unbaksana skidape on•anggiparangara District level Cooperative Society, Self Help Group aro Cooperative Society-ni dingtanggrikaniko agan-talatangengon, block level cooperative society-ni manager, Eugene T. Sangma, Cooperative Society-ko chalaiengachi songna-nokna, joltangna maikai namgni ong•gen aro maikai an•tangtangni janggi tangani gadangko tang•doatna man•gen iani bidingo skie on•a baksa me•chikma dolrangko didiangaha. Una agreba Balachanda-ni Nokma aro DMCS-ni President-ba agan taldapate on•angaha.