Kenegre Govt LP Skulo skigipa dongjani a•sel skul bi•sang neng•nikaniko man•enga
Baghmara, 26 May 2022 : South Garo Hills a·jani Chokpot Block-ni ning·o donggipa Kenegri songni Govt LP skulo skigipa dongjani a·sel bi·sarang Skul poraina brangenga ine songni manderang u•iataha.
Ia obostani bidingo Kenegri songni manderangni u·iatani gitade, Kenegri govt LP Skulo skigipa dongjani a•sel skulko chipe donna nangengaha aro sak 45 bi·sarang skie ra·na man·jaha.
Indakgipa obostarang Kenegri songo ong·engon, sorkari aro education department-ni authority-rang nirok sandie skigiparangko watatna nanga, badiaba songrango skul bi·sarang dongjaoba skigiparang sak 3, ba sak 4 kam gri asonge rona nangpilenga. Uadakgipa skulrangoniko sorkari Kenegri LP skulona watatskode songni manderangna dakchakani ong·genchim ine janapataha.
Indake ong•engon, Garo Hills-ni a•ja ge·antio badita ge Govt LP skulrang donga aro badia songrango skigiparang dongja, uarangko education department sandie skigiparangko on·na nangchongmota. Skulo skigipa dongjani a•sel bang•a songni bi·sarang gimaaniko man·engaha ineba songni manderang janapataha.
Kenegri Govt LP Skulni skigipa Dengagre songni Kingkong M Sangma, skulni Managing Committee-rangna aro songni manderangna maming u·iatgija srik srik an·tangni kamko songtang Baghmara-ona ra·jitangaha. Indakeba, skigiparang an·tangni sika gita authority-rangni maming transfer order gri kamtangko ra•jitangna man•aiama ine songni manderang sing·doangaha.
Kenegri Govt LP Skulo skigipa dongjani gimin songni kangal cholgri bi·sarang gipin private skulrango poraina chol ong•jae govt LP Skulo poraiengachim, indiba skigipa dongjani a•sel skul bi•sarangna dal·bea gimaani ong·engaha ineba u·iataha.
Unbaksana, Meghalaya sorkariko chalaienggipa Skotong Ministet Conrad K Sangma aro Education Minister, Lahkmen
Rymbui, Kenegre songni Govt. LP Skulona ta·rake skigipako watatpachina songni manderang mol·molataha.
Kenegre songni LP skulo poraienggipa bi·sarangna Mid-Day Meal-ko song·e on·chakgipa babilsi nosto ong·ahani giminba songni manderang suk ong·gijaniko parakataha.
Uuni gimin, bi•sarangni namgnina, Mid Day Meal-ko songe on•chakgipa babilsiko gital dake rike on·china gitaba songni manderang a•jani bil gnanggiparangko mol·molataha.