Tura, May 26, 2022: Jabrina skang North Garo Hills a•jani Mendipathar petrol pump-oniko tangka dabiadraa ine matnangenba petrol pump-ni nokgipa badi ka•e mamlako segatanio pangchake Garoland State movement Committee (GSMC)-ni Co-Chairman, Balkarin Ch.Marak-ko pulisrang ri•me pattokchi watataha ine koborko man•aha.
Balkarin Marak, Budbar salo North Garo Hills a•jani District Sessions Court-o an•tangko bame on•na re•angani ja•mano uni jaminko Meghalaya High Court ra•chakjaha. Maina ua Medipather-o a•sel ong•ani bakan uko rim•na sandiahachim, indiba ua adita jarangna katchipe dongaha.
Balkarin Marak, Resubelpara District Court-o an•tangko bame on•na gita GSMC-ni gitcham Chairman aro GHADC-ni Deputy CEM Nikman Marak aro Williamnagar-ni RTI Activist Nilbert Marak baksa re•angahachim.
Koborni gitade, ia bilsi a•bachengo dolsa GSMC-ni membor-rang Mendipathar petrol pump-o petrol rutimgipa ba palgipa manderangona re•ange, jolni manderangna petrol toorangko togie palenga ine matnangenba lak tangkarangko dai gamchina dabiaha.
Petrol pump-o kam ka•gipa manderang GSMC-ni dabia gita tangkarangko on•na jechakahani gimin petrol pump-ko chipataha. Ua somoionin gipin bang•a membor-rangko pulis rim•aha, indiba Balkarin Marak-ko rim•na man•jaha. Uni gimin uko rim•china ge•etaniko on•ahaon uni dongram biapko pulisrang sandioba man•jaha.
Indiba bon•kamao Balkarin Marak, High Court-o jamin ra•na gita re•angaha, indiba ua ru•uta jarangna katchipe dongani gimin High Court jamin on•na gita jechakaha. Indake pulisrang uko rim•e, judicial custody-ni ning•o ra•ange, Tura District Jailona watataha ine koborna parakataha.