Shillongo, 2 May 2022 : Garo Hills-ni robol kal•na changgipa dingtang dingtang biaprangni manderang, Shillong songjinmao kal·susaanio bakko ra·na gita Sombal salo re·angtokaha.
Koborko man·soani gita Meghalaya Game-na re·anggipa West Garo Hills, South West Garo Hills, East Garo Hills, South Garo Hills aro North Garo Hills a·jani bang·a chadamberang kal·susaanio bakko ra·na gita re·angaha.Ia kal·susaanio bakko ra·na re·anggipa Garo Hills-ni chadamberangko soka chakanio namen mitchibegipa sera-bera dakgipa biaprangosa donengani gimin kal·anio bakko ra·na re·anggiparang namen rotogijaniko man·enga ine u·iataha. Unbaksana tusichakani, au-miksuani, a·pal re·ani paikanarang namen mitchibegipa biaposa donenga ine parakataha.
Meghalaya Game-ko soka chakna gong kror 2 tangkarangko chamanahachim, indiba Garo Hills-oni re·anggipa A·chikrangna dingtangmancha seltagijagipa sera-bera mikka selgipa JN. Stadium-o sokachakani gimin mitam dolni manderang dingtang dingtang biaprangchi kate dongchakna gita nangenga ineba u·iataha.