Shillong, July 1, 2022: Re•anggipa June 24 tariko ong•anggipa obostani bidingo pulisrang sing•sandiko dake a•sel ong•anio jak donggipa sak 4 manderangko Bristibar salo rim•aha ine kobor man•aha.
Pulisni u•iatani gitade, bike salgipa manderangko Mawlai Iewrnyghep gittimni SD Khongwir jangchio traffic pulis saksa helmet gangija bike salgiparangko dongdipatachim, indiba uamang traffic pulisni kattako manigija salprete katangaha.
Miggipin obosta, apsandake bike salgipa dolni manderang apsan salon Jaiaw gittimo donggipa Mahari Petrol Pump sepango Swiggy Delivery Boy-koba dokna satna am•e ka•mikkenatenba Jaiaw Pdeng jolchipakna re•angha. Indake uamang Jaiaw Pdeng gittamona sokangenba ES Restaurant mikkango Kerala-ni sakgni intern Rejaz M. Syndeek aro Sarath S Thambi-ko chadrape ka•mikkenataha ine u•iataha.
Kerala-ni intern aro Swiggy Delivery Boy-ko dokna am•e ka•mikkenatani bidingo Lumdiengjri Pulis Station-o ge•gni FIR-rangko ka•aha. Uandake Traffic pulisni beng•ako manigija salprete katangani gimin Mawlai Pulis Stationo badi ka•aha.
Bang•a manderangchi kobor ra•e aro sing•sandianiko dakani ja•mano pulisrang ua obostao jak donggipa sak 4 manderangko rim•aha. Indake sing•sandiako dakahaon, uamang an•tangtangni dosko ku•chakaha ine u•iataha.
Indake dos dakgipa sakbri manderangko Katchari ba Court-ona Bristibar salo rimangaha, aro uamangko salbongana Pulis Remand-o donataha. Indake rim•a man•gipa sakbri manderangni kosako Lumdiengjri Pulis Station IPC Section 341,342,427,32, 106-o pangchake badi ka•angaha. Uasan ong•aigija Mawlai Pulis Station-oba IPC Section 353,323,427 aro 34-o pangchake badi ka•dapangaha ineba u•iataha.