Tura, June 16, 2022: Re•anggipa antirangoni dondikgija mikka waengani gimin bang•a dingtang dingtang PWD sorokrang changni chang nosto ong•ako man•aha. Indake ong•engon, dingtangmancha West Garo Hills a•jani Garobadha, Selsella aro Balachanda PWD sorokrang namen namsrangjaha ine West Garo Hills a•jani Deputy Commissioner, Swapnil Tembe parakataha.
Indake mikka wamitting somoio jrimgipa garirang sorok namgijagipa gita re•ruraaniko dikdiksana dontongatchengaha ine u•iataha.
Unbaksana, ramaram manderang, nangai nangjai iandakgipa sal somoio songreanirangko gelchina didiataha. Indake songremitting somoio rang•gitik maiba a•sel ong•genchimode, ta•raken sepanggipa pulis station aro block office-ona u•iatchina gitaba DC mol•molataha.
Indakmitting somoio LMV garirangko simsake salna nangchongmota, jedakode, an•tangtangna naljokaniko man•gen. Uandakgipa obostarang soroko ong•genchimode, district facebook page-o u•iatna namga ineba DC u•iataha.
Mikka wachini salrango jrimgipa garirang Garobadha-oni Hallydayganj gita Rajabala-ona re•rurana man•gen ineba u•iataha.