Shillong, June 16, 2022: East Khasi Hills a•jani Mawphlang C&RD Block-ni ning•o donggipa Laitlarem songo mikka jimbee waanichi nok be•dape nokdang ge•sani sakbri bi•sarang janggitangko gimaataha ine u•iataha.
Sianggipa sakbri bi•saranga me•a bi•sa sakgni aro me•chik bi•sa sakgni ong•achim, uamangoni me•a bi•saranga saksa bilsi 9 sakgipin bilsi 4 aro me•chik bi•saranga saksa bilsi 6 aro saksa 4 ong•ahachim.
East Khasi Hills a•jani Deputy Commissioner Isawanda Laloo-ni koborna u•iatani gitade, sak gittam bi•sarang a•damon janggitangko gimaataha aro sakgipin bi•sako bang•a mata bu•anirangko man•ahanina sanna banna niko dakna gita sepangbatgipa Sohiong CHC-ona rimangaha.
Ia a•selni bidingo BDO, Medical Officer aro Pulisrang a•damona re•ange sing•sandianiko dakenga ineba u•iataha.
Skotong Minister Conrad Sangma duko gaakenggipa nokdangni manderangna ka•dimeani kattarangko aganatan baksa kalimpaaniko on•ate, sianggipa sakprkana tangka gong lak 4-ko on•na ku•rachakataha.