Resubelpara, June 17, 2022:Garo Students’ Union (GSU) Northern Zone, Resubelpara June 17 tarik Sukrobar salo GSU Depa Regional Unit-ni dilgiparangko seokna eleksin-ko ong•atangaha ine GSU Northern Zone-ni President Landslord Momin u•iataha.
Batanggimin salrango GSU Depa Regional Unit-ni ning•o donggipa chatro chatrirang gital dilgiparangko seokna eleksinko ong•atchina dabie jingjengatahani gimin, GSU Northern Zone, eleksin ong•atna man•kuja dipetna GSU Depa Regional Unit-ko dikdiksana bon•ataha aro indake GSU Northern Zone, GSU Depa Regional Unit-ko jako ra•e pilak kamrangko ka•angaha.
Indake June 17 tarikosa eleksinko ong•ate, GSU Depa Regional Unit-ni gital dilgiparangko seoke on•angaha.
GSU Depa Regional Unit-ni ning•o donggipa chatro chatrirang GSU-ni dongimin niam gita GSU Depa Unit-ni gital dilgiparangko seokangtokaha. Gital seoka man•gipa dilgiparangara President-na Salangka N. Marak aro General secretary-na Jimfort N. Marak-ko seokaha ine u•iataha.