Jowai, July 4, 2022: Jaintia Hills-ni pulisrang Robibar attamchibara, Silchar-oni Shillong-ona re•baenggipa garirangko ning•joljol kobor man•soe, Umtyra Check Post-o Special Naka dolchi sandi rikitaniko a•bachengataha.
Indake re•baenggipa garirangko pulisrangni sandirokaniko nike, mikkangchina re•baenggipa gari bolgni ki•sangchi bidinne katangpilna jotton ka•engmittingo pulisrang rikange uamangni garioniko bosturangko ra•sekaha.
Bolsa Maruti Dezire ML-05N 9889, jean West Jaintia a•jani Pohshnong, Nartiang songni bilsi 35 ong•gipa Pynhoi Nongtdu-ni gari ong•achim. Sakgipin East Khasi Hills a•jani Pdengshnong, Mawryngkneng songni bilsi 23 ong•gipa Banteilang Mynsong ong•achim.
Uamang sakgniko pulis rim•aha aro uamangoniko gram 326 heroin ba mandeko pekate tusidimuatgipa sam baksa mobile phone ge•gniko ra•sekaha.
Bolgipin Maruti Dezire gari AS-11T 1645-koba rim•aha, jean Khliehriat Pulis Station-ni ning•o ga•akachim, ua garioniko niam gri badingenggipa ge 13 cigarettes carton-rangko ra•sekaha. “Chinga iandakgipa garirangko rim•na gita sandienga” ine pulisrang parakataha.