Tura, July 4, 2022: DVSEDS dolni President aro Secretary, Darengre NH-51-oni Nengja Bolchugre-ona tarigipa PMGSY ramako da•onaba matchotatgija galchipe donengani gimin West Garo Hills a•jani Deputy Commissioner-na lekka sedoataha.
DVSEDS-ni janapatani gitade, neng•nikaniko man•enggipa songranga Nengja Bolchugre, Dilnigre, Nengjapara, Teksragre, Gallabalgre, Amindagre, Amakgre aro Mengkragre ong•achim. Ia Darengre NH-51-oni Jengjal Bolchugre-ona dakanggipa PMGSY ramako batanggimin 2014 bilsionin kam ka•na a•bachengaha. Indiba kam ka•ani bilsi 9 ong•piloba da•onan matchotkuja. Ia matchotgijagipa ramani a•sel bang•a songni manderang bilsianti neng•nikanirangko chagrongenga ine janapataha.
“Kobor u•iatani gitade, ia ramako tarina a•dokni gitcham Skotong Minister Dr. Mukul Sangma-ni chawari-ni pagipa Fersen Ch. Momin-na ia kamko 2014 bilsio on•aha. Ua saksa skia poraia gnanggipa mande ong•genchimoba, songni manderangna maming chanchiani gri an•tangni namgninasa chanchiaiaha. Songni poraienggipa chatro chatrirang aro manderang salantian ia namgijagipa ramani a•selo neng•nikaniko chagronga. Adita bilsirang gapilaha, indiba ia ramako taria matchotkuja aro tarigimin ramarangba nosto ong•ako man•aha. Songni manderangsa jinma ku•monge nosto ong•gimin ramarangko tarie re•enga. Ia obostani bidingo nirok sandina nangchongmota aro je mandenan ia kamko jako on•ahachim, ua jinmani namgnina chanchie kamtangko matchote ka•e on•na nanga” ine DVSEDS janapataha.