AHP, duko ga•akenggipa Khalu songni manderangna tangka baksa relief-ni bosturangko ra•ange on•nea 

Tura, 4 July, 2022: A•chik Heritage Persuits (AHP)-ni membor-rang Sombar salo changsatai South Garo Hills a•jao chi bananichi duko ga•akenggipa Khalu songni manderangna relief-ni bosturangko ra•ange on•eaha. AHP, Khalu songni manderangna cha•ani bosturang jekai mirong, dal, chini, kari, song•a chananio jakkalgipa bosturang, gombolrang (blankets), amrang, tarpaulin, kerosene, kerosene stove aro gipin bosturangko suale on•angaha.

AHP-ni janapatani gitade, dingtang dingtang Mondoli dolrang, skulrang, Wildlife Trust of India, Tura, Dalu, Williamnagar aro gipin biapni manderang ka•sae on•gilatgiparang gimik tangka gong lak 3 hajal 83-koba duko ga•akenggipa nokdangrangna suale on•angjolaha.

Una agreba Tura Baptist Mondoli, Aeroville Skul, Don Bosco Kolege, Dura Wasa Club, PWD Building Division, Rongjeng PHE, Chiring Dokru SHG, GHADC-ni CEM, Father Fellowship Football Team, Garo Engineering Band, Bolanchi A•ding gittim, Blue van Tura, Kusimkol Baptist Mondoli re•anggipa June jao chi bananichi nok-jam, cha•a-ringani, ba•ra-chola, song•chak chanchakani gri dukko man•enggipa nokdangrangna on•gilattokaha.

Ia bosturangko Khalu songni Jimychrist G.Marak-ni jako on•atenba Khalu songona km 7-ko ja•achi re•angaha. Indake nokdangantina gong hajal 10-ko jakogrik Rengdim Nokmani jako on•baha, apsandake Khalu aro Rongcheng songrangna relief-ni bosturangko on•angaha ine koborna u•iataha.

Indake duko ga•akenggipa nokdangrangna ka•sae dingtang dingtang cholrangchi dakchakatgipa aro on•gilatgipa manderang sakantiko AHP team gisik ka•tong gimikchi mittelatskaha.