Johnwell Momin chatro chatrirangna dakchake on•ani namgipa cholko a•bachengata
Shillong, April 21, 2023: NEHU aro gipin College-rango kam ka•engiparang aro poraiengipa chatro chatrirangna form-rang ba lekkarang aro Certificate-rangko bikotna man•na gita Tura aro Garo Hills-ni dingtang dingtang biaprango dongengiparangna, Johnwell G.Momin nambegipa cholko on•na gita dakchakaniko on•enga ine parakataha.
Johnwell Momin-ni parakatani gitade, Tura aro dingtang dingtang Garo Hills-ni biaprango, dongengipa chatro chatrirang songre songgabatani bidingo bang•a neng•nikaniko man•enggipa chadamberang, maiba Official kamni gita dingtang dingtang lekka ba Form-rangko submit ka•na gita NEHU aro gipin College-rangchi songrena nanganio neng•nikaniko man•engiparangna ia cholko on•ne dakchakanggen.
Jekon re•angipa 2012 bilsioni da•alona kingking Tura-ni gitcham MLA, Pa Bellykid A. Sangma, Garo Hills-ni bang•a manderangna dakchakaniko on•aha. Uandake, ianpako adita tangka paisarangni bidingo neng•nikaniko chagrongani a•sel, da•o Johnwell G. Momin ia kamko mikangchi dakangskana kang•kare ka•enga ineba parakataha.
Uni gimin na•simang ia on•engipa ‘Helpline Number’ ona je somoioba call ba text ka•ate, ia (Helpline-Whatsapp-Number 7085290362)-o u•iatna gita man•gen. Bang•a manderang ia neng•nikaniko chagronge, bang•a dingtang dingtang kamrangna Shillong re•bae kamko ka•na gita tangka paisani bidingo neng•nikaniko man•tokenga. Mongsongbate, chatro-chatrirang an•tangni nanga kamrangna, lekka ba form-rangko submit ka•na aro uamangni dingtang dingtang Certificate-rangko bikotna re•ruraanio neng•nikaniko chagrongengipa chatro chatrirangna dakchakaniko on•na Johnwell G. Momin ia nambegipa kamko a•bachengataha ine u•iataha.
Ia kamko ka•anio uni ripengrang bakko ra•enga aro songni nokni dal•dalgipa manderang, ia nama kamna kusi ong•chakan baksa agan ku•patianirangko on•dapataha.
Unbaksana na•simang je cholko nanggenchimoba, ia number-ona call ka•e, an•tangni nanga kamrangko janapatna gita man•gen. Uni gimin Ma•a Paarang an•tangtangni dedrangna College-rang ba uamangni Admission-rangna neng•nikenga ong•ode, ia cholko ra•na man•gen. Iako dakanio na•simangoniko maming dakeba tangka ra•na ka•jaenga aro tangkarangko on•na nangjawa. Indiba biap damsaoni damgipinona re•na gita petrol koroskosan on•na nangaigen ine u•iataha.
Bebe gita, na•simangni kam nangnirangko name aro tom•tome matchotatna ba chu•sokna man•ode, na•simang an•tangni man•a gita jaksrame aro kusi ong•e, on•pilskanikosa nangaigen. Indiba, maming dabiani dongja.
Ia ku•monganiko dakengon, Johnwell G .Momin aro uni team membor-rang na•simangna ia nambegipa cholko on•a baksana na•simangni gamchatgipa gun aro bewalko aganengon,
“Mande jatska ong•e, saksa sakgipinna nangani somoirango dakchakgrikna aro janggi tanga dipet namgipa gunrangko jakkale ka•sagrikaniko ripingna aro saksa sakgipinna gipatna iako janapatenga” ine Johnwell Momin u•iataha.
Iako janapengon, an•ching badita manderang dingtang dingtang kam nangani somoio Shillong-chi songrena gita tangka-paisani bidingo apchangket ong•e, re•bana chol man•gija dongengiparang neng•nikaniko man•engani gimin sudna ra•sroe, a•a-chiko palaona sokenga aro dingtang dingtang an•tangni gamrangko Shillong-chi re•na mang mang palna nangao ga•akenga aro indakgipa obostaona sokenga
Uni gimin, altue maming neng•nikani gri an•tangni kamrangko dakna, Johnwell G. Momin aro uni team ia kamko ja•ku de•enga. Jemangan an•tangni dingtang dingtang kamna Garo Hills-oni ba Tura-oni songrena nangiparangna chinga, tangka, paisa aro somoirangko save ka•e, cholko on•enga.
Ian mandena ka•sae on•pilskani ba dakchakaniko on•na bikotgimin indin on•enggipa cholko dakengon, Johnwell G. Momin aro uni team iako dakmesokanichi A•chik jatni namgnina, mikkangchi saksa sakgipnna dakchakaniko nambate on•angna miksonganio ia kamko a•bachengataha ineba u•iataha.