George Prince sak 71 AHAM-ni membor-rang ong•katgrima ine parakatanina talata
Tura, April 21, 2023: A•chik Holistic Awakening Movement (AHAM) CEB-HQ Tura-ni President Geoge Prince Ch.Momin, sak 71 AHAM-ni membor-rang ong•katgrimaha ine parakatgipa kattarangko jegalatskaha.
Georgeprince Momin-ni parakatani gitade, re•angipa April 18 tariko bang•a dingtang dingtang songbad-rango aro electronic media-rango, AHAM Headquarter Tura aro Assam State Zone-ni membor-rang baksa Bolori, Aradongga, Boko Unit-ni membor-rang ong•katgrimaha ine seataha. Indiba ia kattarang kakket ong•ja.Indiba AHAM-ko namnikjae mikbuenggipa manderangsa dolko biming man•atna tol•drae songbad-rango seataha ine parakatskaha.
“Batanggipa 2019 aro 2020 bilsio adita manderang an•tangtangni man•gnina miksonge, AHAM dolo napeaha. Uamang an•tangni sika gita dolni ka•rimskarangko sason ka•na aro an•tangtangni sika gita kamrangko ka•na man•jae, 2021 aro 2022 bilsio AHAM dolni adita sak membor-rang tol•e matnangenba ong•katdilaha. Indiba uamangni ong•kataniara, AHAM dolni kam ka•anirangko on•tisaba dingtangatja. Batesa AHAM-ni kam ka•anirangko aro miksonganirangko namnike skia poraia donggipa chadamberang da•alo AHAM dolo nape, A•chik jatna dangdike on•na kang•kare kaenga. Je manderangan batanggimin bilsio AHAM doloni ong•katahachim, uamangsa AHAM dolko namgija biming man•atna pa•sike songbad-rango seataha” ine Georgeprince Momin parakataha.
AHAM-ni dilgiparang darangkoba gisik saatjawa aro mikkangchi apsan ku•monge kamrangko ka•anggen. Jattangna aro manderangna dangdike on•nasa, NGO dolko bikota, dolsa dolgipinko matnangna ong•ja. NGO dolo napengon, an•tangko jatna aro a•songna dangdike on•na aro warachaknasa napa. Apsandaken, AHAM dolba jat aro a•songni man•gnina aro namgnina warachaknasa an•tangtangko on•kangaha ineba ua taldapataha.
AHAM doloni ong•katanggipa manderang an•tangtangni neng•nikani a•selsa ong•kataha. “Chinga uamangni kosako maming namgijako aganani dongja. Indiba je manderangan ong•katangahachim, uamang dongrikenggipa dolni bimingko tol•gipa kattarangchi ong•siatna nangja. Chinga AHAM dolko A•chik jatna minge dangdike on•nasa bikotaha, dolona napbaenggipa, manderangko chinga ku•si ong•e rimchaksoa aro wate re•angenggipa manderangba an•tangni neng•nikani a•selsa re•angenga. Uni gimin maming dakeba champengrikani aro matnange agananiba dongja” ine Momin parakataha.