Tura, June 24, 2022: Re•anggipa June 21 tariko Gondenggre songni Kenedy Ch.Marak aro Jimberth T.Sangma-ko Jengjal Pulis Station-o niamgri konta 6-na kuturio chipchange donani gimin Nilberth Ch. Marak raken jegalatenba, Jengjal Pulis Station-ni Officer in-charge BA Bamon-ni kosako Director General of Pulis (DGP)-na badi ka•e lekka sedoangaha.
Bamon Pulis Station-ni ning•o kamtangko ka•engon, Uniform gri an•tangni bilko jakkalsreta ine ua janapataha.
“Ronjit T Sangma aro Mechael Ch. Marak, Kennedy Ch Marak, Chubath D Sangma, Welping Ch Marak, Christopher Ch Marak aro Darseng Ch Marak-ni kosako tol•e badi ka•anj gimin Jengjal Pulis Station-ni Officer in-charge, maming sakki gri Kenedy Ch. Marak aro Nokma Jimberth T. Sangma-ko niamgri konta 6-na kuturio chipe donaha. Indake uamangni badi ka•aniko man•ne Jengjal Pulis Station-ni SI Bamon, June 20 tariko Ronjit Sangma aro Michael Marak-ni badi ka•anina, Kenedy Marak aro Jimberth Sangma-ko June 21 tariko Jengjal Pulis Station-ona okgamataha. Indake SI-ni okgamataniko man•ne 21 tariko Kennedy Ch Marak aro uni namchiktang Retina Ch Marak aro gipinrang re•bae SI-ko grongeaha. Indiba SI Bamon, Kennedy Ch Marak aro Gondenggre-ni Nokma Jimberth T Sangma-ko kal•ake roaha” ine Nilberth Ch Marak janapataha.
Kennedy aro Jimberth-ni u•iatani gitade, SI uamangko pring 11 bajioni attam 5 bajiona Section 447, 427, 188/34 PC-o pangchake Jengjal P/S Case No.7(6)-ni bidingo statement-ko ra•gen ine kanta 6-na kingking uamangko kuturioni ong•katna on•jaha. Indake uamangni aganani gitade SI ua somoio busy-ba ong•jachim, ua re•mikmikesa somoiko re•atenga. Uamangko kuturio kanta 6-na kingking chipkete donani ja•mansa statement-ko ra•aha. Ian sorkarini dongimin niam Article 21-ko pe•ani ong•chongmota. Pulis Station-ni kuturio chipkete donako man•gipa manderang, SI Bamon uamangko statement ra•ani somoioba pulis uniform-ko ganjachim aro South Indian Film-o gita Pulis Station-ni ning•on uamangko statement ra•ani somoio cigarette ringpongponge gunda dake dagrange roaha. Pilak Department-ni manderangan an•tangni kamtango mande ra•na nangchongmota. Pulis Department-o kam ka•enggipa manderang kamni somoio uniform-ko gankamna nangchongmota. Meghalaya Pulis Act 2010 aro Pulis Disciplinary Rules Section 70 (k)-o janapani gitade, Pulis Department-o kam ka•enggipa pilakan kamtangko kakketo ka•na nanga, pulisrang biltangko ong•gija kamna jakkalna nangja aro kamo ong•enggon Uniform-ko ganna nangchongmota ine sea gnang.
Indiba Jengjal Pulis Station-ni Officer Incharge-de ia niamrangko pe•aha ine Nilberth Ch Marak janapataha.
Pulis Accountability-ni Chapter XII Section 73 aro 74-o janapani gitade, Meghalaya a•dok sorkarini Chairperson aro Accountability Commission-ko songna nanga. Indiba Meghalaya a•doko da•odipetde Pulis Accountability Commission dongjani a•sel Meghalaya Pulis Act, 2010-ni ning•o donggipa Section 86 (10) (Right to Complainant), pulis dolni ong•gija kam ka•aniko nikgenchimode ba chagronggenchimode, Departmental Pulis Authority-rangna badi ka•china bilko on•a. Indake ia badi ka•aniko gipin Commission-ba Court jako ra•genchimode, Pulis Accountability Commission maming dakeba jako ra•skajawaha ine janapa gnang.
Iani bidingo SI Bamon-ni kosako Pulis Accountability Commission-na badi ka•aniko dakenga jedakode, uamang kamni kri uko niangskagen. Meghalaya Pulis Act 2010 Section 80 (1) (e)-o janapani gitade, Department-ni Authority ba Accountability Commission obostako chagronggipa mande ku•tangchi see jote on•genchimode, badi ka•aniko ra•chakgen ine janapa gnang. Uni gimin Section 80 (1) (e)-o pangchake Jengjal Pulis Station-ni Officer Incharge BA Bamon-ni kosako badi ka•aniko dakenga aro uni kamni kri una kragipa sastiko on•na nanga ine Nilberth Ch.Marak aro Kennedy Ch Marak janapataha.