Tura, June 24, 2022: West Garo Hills a•jani Deputy Commissioner Swapnil Tembe, tol•gipa Scheme-rangko bebe ra•e tangkarangko galjachina mikkrakataniko on•ataha.
Tol•gipa manderang Social Media jekai Facebook, Instagram, Twitter, Advertisement, SMS, WhatsApp, Website, aro Phone call-rang gita manderangna tol•pinikgipa Scheme-rangko watate tangka rope cha•enga ine parakataha.
Iani bidingo Deputy Commissioner Swapnil Tembe manderangko mikkrake dongchina aro uni ge•etanirangko ja•rikchina didiangaha.
“WhatsApp, SMS, E-mail, Messenger, Instagram-rango watenggipa link-rangona skatang napange ninabe. Uamangni watatgipa link-rangchi napange nigenchimode, na•simangni message-na photo-rangko niksona gita man•gnok. Na•simang u•igijagipa manderangni watatgipa linkrang ba advertise ka•gipa linkrang gita mobile app-rangko download ka•na nangja. Indakgipa app-rangko download ka•genchimode, hacker-rang nangni phone-ona napange nangni information-ko bikotna altua. Mobile app-rangko download ka•engon pangnan Google Play Store ba Apple Store-kosa jakkalna nanga. App-rangko phone-o install ka•genchimoba, ua app-ni bidingo tale ma•sichenggija photo-rang, video-rang message aro location-rangko ma•sina aro napna gita raiko on•na nangja. Nangni Bank Account baksa bakrime jakkalenggipa phone numberko skatang manderangna on•na nangja. Google-o sandie man•gipa Customer Care-ni nombor-ko skatang dial ka•na nangja. Nangni u•igija manderangna skatang tangkako watnabe, unbaksana e-mail ba WhatsApp-rang gita on•atgipa bar code-rangko skatang Scan ka•nabe. Saoba na•song Department-ni Officer-ni ja•chipchangrangko Profile Picture donne nangna u•igija nombor-oni WhatsApp ka•atgenchimoba, skatang bebe ra•nabe. Two factor Authentication-ko activate ka•bo, jedakode na•a naljokaniko man•gen. Iako activate ka•na settings-on man•a. Emergency ong•genchimode, Helpline nombor 1930-ona call ka•e u•iatna gita man•gen” ineba DC u•iataha.