Tura, June 24, 2022: Garo Students Union (GSU) Western Zone (North) Dadenggre, Phulbari MePDCL Department-ni Sub Divisional Manager, Divya Ranjan Panda-na lekka sedoataha.
GSU WZ-ni President Tengsan M.Marak-ni janapatani gitade, Dadenggre aro Rebugre songo transformer nosto ong•enba ja 2-na bate bijoli dongjaha, uandake Damal A•sim aro Chengalgre songo ja 3 mang bate bijoli dongjani a•sel songni manderang bang•a neng•nikanirangko man•enga. Bijoli dongjani a•selo porikkana tarisamsoenggipa chadamberang walo poraina gita man•jaenga aro online klas-rangko ra•na gitaba mobile battery dongjae klas napna man•ja, una agreba noktangtangona chirangko motor-chi saldona man•jae chel•bea biaprangoniko chirangko ra•bana nangenga.
“Chinga changni chang dakchakanirangko on•china Dadenggre aro Phulbari MePDCL Department-na lekka sedoahachim, indiba da•alona kingkingba maming dakchakanirangko on•kuja. Indake ong•engon, chingni seatanina konta 48-ni gisepo maming aganchakaniko on•jagenchimode, chinga jinma nangrimenba jingjengatanirangko ong•atanggen” ine Tengsan M Marak janapataha.